| obad's profileObadPhotosBlogLists |  Tools  Help |
|
Obadلا تحزن إن لم تحصل على ماتريد, أحيانا يكون عدم حصولك عليه ضربة حظ لا تقدر بثمن July 25 Friendsتعرفت عليهم خلال فترة الجامعة – ماكانتش معرفة دايمة- كنت باجتمع بيهم تهريب من وقت لوقت- ماكنتش بافهم كل كلامهم- بس حبيتهم – وحبيت طريقتهم لاني مستحيل ف تلك المرحلة ان افعل مثلهم- فعشت تلك المرحلة من خلالهم- حياة بسيطة لكن جميلة- متداخلة لكن بلطافة – شخصيات متناقضة اجتمعوا على التمسك ببعضهم البعض – فعلا ما احلى الاختلاف وما اصعبه ( يعني لو كل البشر زيي- يالهوي وخرابي ع اللي هيحصل لنا – بس مع كدة الواحد بيحاول يوصل لارضيات مشتركة مع اللي حواليه عشان ماتبقاش سداح مداح والطحالب لاتنمو الا ع الماء الراكد الاسن لذلك لابد من الحركة والتطور وعدم الجمود على راي او موقف)
6 شخصيات : بروفيسور في عصر ماقبل الكامبري : ضايع ومابيعرفش يسكت وعالم , محلل نظم : دمه خفيف وواقعي وناقد لاذع ومابيسيبش حاجة تفوت من غير مايعلق عليها , ممثل فاشل: تحفة وأكيييل وجغل وطفل كبير طباخة ماهرة ومحبة للنظام وسوسة نظافة ولازم تفوز ف اي حاجة تدخلها- بنت ثرية مدللة مخها على قدها تخلت عن الثراء واعتمدت على نفسها وعاشت بالطول والعرض – مدلكة مخها ضارب والله العالم مبتعثة من كوكب المريخ للكشف على اهل الارض
تمازج عجيب بين هذه الشخصيلت لا خلاف حول دين او راي او ماديات او ذوق. كنت ارجع م الشغل واحاول قدر الامكان اني الحق اشوفهم قبل مايخلصوا عشان اضحك شوية واطلع جزء من هم وقرف وتعب اليوم وفعلا اسعاد الناس وادخال السرور على قلوبهم مش سهل . استمروا مع بعض 10 سنوات كاملة والدنيا لعبت فيهم وبيهم بس بقيوا مع بعض.
الاسبوع اللي فات شفت اخر حلقة من المسلسل دا وبصراحة زعلت عليهم لانها قصة حلوة – فكرة مريحة – حلم جميل نحتاح اليه لكي يدفعنا الى الامام لرؤية الضوء في اخر النفق (زي مالناس زعلت على طلاق بوسي ونور الشريف – مع انه قضية خاصة وبتحصل لالاف غيرهم ولكنهم كانوا نموذج وحلم في عيون من احبهم ويالهي ما اصعب ان يتكسر حلمك او نموذجك امام عينيك ولا تملك حولا ولا قوة لايقافه)
بعد لما قرفونا 8 سنوات رجعوا لبعض وكانت نهايتهم سعيدة (مبروك ل روس وراشيل) واحلى تحية ل تشاندلر ومونيكا – اما جوي وفيبي ف لازم ينحطوا ف المتحف
وسلام مربع لكل الحبايب بتوع الغزو الثقافي J
July 15 سوق على مهلكتحل غدا الذكرى الخامسة (على حسب التقويم الهجري المعتمد هنا) لحصولي على رخصة القيادة (والرخصة هاتنتهي بكرة ولسة ماجددتهاش- بس ناوي أطلع بكرة ع المرور- يامسهل) وهي ذكرى جميلة وغريبة ومثيرة للشجن والذكريات . ويرتبط عندي الحصول ع الرخصة بمعرفة السواقة وبصراحة أُعتبر من المتاخرين في الحصول على رخصة القيادة وتعلم السواقة – ليس على مستوى العائلة (حتى المفعوصتين هناء وشيرين طلعوها وهم عمرا اصغر مني لما انا طلعتها) ولا على مستوى الاصدقاء ولا القاعدة بل على المستوى القومي ولا فخر.
اخواني : الفرسان الثلاثة J – اتعلموا السواقة بدري , اتوقع اول مابوادر الشنب عندهم تبان بيبقوا مؤهلين للعب ف منتخب تحت 18 سنة ويتعلموا السواقة سواء بطرق مشروعة او بغير مشروعة ولعل دا احد الاسباب اللي خلتني مش متعلق بالسواقة: اني مش محتاج – هاسوق ليه؟ هاتضيفلي ايه السواقة؟ هاتجيني عربية مناسبة هدية بمناسبة نجاحي ف الثانوية او دخولي الجامعة – طبعا لا- يبقى شيل من الدماغ وركز ف الحاجات الاهم.... والعهدة ع الذاكرة - بهاء كان عنده سيارة صغننة غير ذات ملامح وكان بيسوقها وهو حافي وحاجات كدة- بعدين ف اول التسعينات جاب سيارة سوبارو حمرا بشنطة كبيرة وبعدين غير سيارتين والله العالم ضياء فاكرله المازدا ذات اللون الازرق الفاتح موديل 85 ولا 86 اللي لوحتها كانت مميزة من 4 ارقام وكان عنده زراير المؤشرات في الطبلون (عايق من يومك) وبعدين وهو ف جدة المبيتسويسشي جالنت الدهبي اللي بتشتغل بالريموت وحركااااااات وهو ادرى بالباقي صعصع : كان بيسوق عربية الوالد : تويوتا كارينا حمراء اللون موديل 79 وبعدين التيرسل الخضرا ف اخر التسعينات وبعدين الكامري السودا سيادتي: لما اكبر دماغي عن حاجة اكبرها للاخر- يعني غير كل الشباب اللي حواليا – تور الله في برسيمه في اي حاجة ليها علاقة يالسيارات : الموديلات والاسعار والانواع وال سي سي وكام حصان وعلاقة اللون الخارجي ب لون الفرش الداخلي والاكسسوارات ونوع الزيت المناسب والجنوط وووووو والدي وصعصع حاولوا يعلموني بس كنت رافض- حاولت واكتشفت ان الموضوع عايزله صبر ف الاول وانا انسان مخي تخين فلازم كل حاجة افهمها ب مخي الاول واحط ايدي ع العلاقة الشرطية (اذا عملت كدة هيحصل ايه واذا ماعملتش ايه اللي هايحصل)......طيب اللي يشيل قربة مخرومة مايلومش الا نفسه واتعلم براحتك خلصت الجامعة ف 6-2002 وجاني العرض بتاع اول شركة اشتغلت معاها بعد اسبوعين – وكان لازم يكون معايا رخصة قيادة – استغليت الوقت اللي خدوه عشان ينقولولي الكفالة وقدمت على "دلة" لتعليم القيادة- عملولي الاختبار المبدئي وطلعت ف الطراوة وادوني دورة 4 اسابيع – كل يوم اخد تاكسي ب 15 ريال رايح و 15 ريال راجع عشان اتلم مع الجروب الحلو كلهم بسم الله ماشاء الله عمال اسيوين ومصريين لابيفكوا الخط ولا بيعرفوا الفرق بين الالف وكوز الدرة – كان في 3 ولا 4 مدرسين مصريين وكل واحد معاه عربية وكانوا بيقسمونا عليهم بالدور : يوم نطلع قدام بس ويوم نرجع ورا والاقماع والسواقة الخارجية وحاجات كدة - يعني من الاخر زي الاعلان مابيقول : صبرتو و ملتو وأتت لحظة الحقيقة- الامتحان – قبله بيوم قعدت اذاكر – اقنعت واحد صاحبي واستاجرت عربية ب اسمه وطلعنا سوا لموقع الجريمة- قصدي الاختبار- وهات يا سواقة طول اليوم – فاكر اكبر مشاكلي كانت لما احول من سرعة ل سرعة او اركن العربية J فاكر اني بالليل خدت البنات وطلعت لفيت بيهم شوية ووقتها كنت لسة شاري شريط سكن الليل ل امال ماهر ومشغله ف العربية- بصراحة كانت مجازفة من البنات بس عدت على خير رحت الامتحان – حطونا كدة ف مدرج ( مش زي بتاع جلادياتور ولا حاجة) وينادو علينا لغاية مالعربية تتملي – يعني 4 او 5 اشخاص- سيارة سيدرك بيضا ورجل المرور قاعد جنب السواق وكل واحد بيسوق شوية بس مفروض زي الكتاب مابيقول (حزام ومرايات و اشارات وووو) و الحمد الله عديت الامتحان العملي والنظري وأخدت الرخصة. أول سيارة جبتها كانت هوندا اكورد رصاصي موديل 2002 وطبعا كانت اوتوماتيك وسقتها ف 24-11-2002 وياعيني – هي فعلا اللي تعلمت فيها السواقة واتوقع اني انتقلت من مرحلة الغشامة الى الاحتراف على دريكسونها وسقت بيها ف الرياض والدمام وجدة ومكة ولما نقلت شغلي التاني ورجعت الرياض بعتها ف 22-2-2006 وجبت سارة – ليكزس ار اكس 350 سوداء في 4-3- 2006 اللي سقت بيها ف الرياض والدمام والبحرين والامارات وكل العيلة الكريمة ماعدا فارس ركبوا فيها J وعلى فكرة ماعرفش اي معلومات تقنية او ميكانيكية عن سارة – باوديها الوكالة وب ادي العيش لخبازه – انا اسوقها واعتني بيها وخلاص...
امبارح وانا رايح ع المستشفى (مش طلعت النقاهة اللي كانت عندي نقاهة كاذبة) لمحت سيارتي الاولى واقفة – وانا ليا فترة باقول ياترى هاشوفها تاني ولا خلاص – رحت سلمت عليها وبصيت لها من فوق لتحت ومن جوة ل برة – في شوية تحسينات بس واضح انه مش بيعتني بها كويس – احساس غريب : شيء كان يخصك بس دلوقتي مع غيرك ومش من حقك الا انك تقرب من بعيد - بس ف الاخر مش هو انا اللي بعتها ؟ عشان كدة مابحبش ابيع اغراضي J ومافيش احسن م الجديد وعلى قد لحافك مد رجليك- وحمارتك العرجا تغنيك عن سؤال اللئيم ووووو------ لبقية الامثال : الرجاء التوجه الى سبيس صافي ....... وسلامتكم ومانجيكمش ف رخصة J
July 13 ايه رايك؟كلام جميل وبيطرق ع الوتر الحساس ويعبر عن اشياء بداخلي لذلك ارتأيت ان اشارككم اياها لعل وعسى
منقوووووووووووووووووول عن
موقع العربية 13-7 للكاتب المعمم: ضياء الموسوي
----------------------------------------------------------------------------------
نحن قوم منزهون، جلودنا سماوية، دمنا أزرق، وجيناتنا ملائكية، ومشاعرنا حريرية مخملية، لانقتل لانذبح لا نتآمر لا نرعب احدا كل العالم متآمر علينا وكل مايجري علينا هو بسبب (الامبريالية). فهذه الامبريالية هي نفسها وراء حروبنا التاريخية، فهي وراء قتل الخلفاء الراشدين، ابتداء بالخليفة عمر ومرورا بالخليفة عثمان وليس انتهاء بالامام علي. الغرب هو وراء قتل قابيل لهابيل وعبدالرحمن بن ملجم قاتل الامام علي، وهو بالمناسبة من كبار معلمي القرآن في الكوفة، جندته الامبريالية العالمية لهذا الفعل الاجرامي. خطباؤنا الافاضل لن ينفكوا في اتهام الغرب ايضا في اذكاء شرارة الفتنة في حرب البسوس. نعم كلها مؤامرات علي جسدنا البرونزي القدسي الجميل، وعلي طهارة قلوبنا المفعمة (بالخير) و(الطهارة) والمطرزة بالذهب الملائكي والالماس السماوي. نحن امة بلا أخطاء، امة لاتعرف الخطأ، تاريخها جميل، مشرق، مضيئ لم تسفك فيه قطرة دم واحدة. نحن معصومون عن الخطأ، واجسادنا قبل مواقفنا، تقطر طهارة وحلاوة، لانها مصنوعة من البقلاوة والفستق والعسل.
July 12 ريشة في مهب الريحنبدا من الاول كان عندي تدريب ف دبي يومي 4 و 5 يوليو للحصول على الشارة الصفراء ف الجودة وصلت دبي يوم 3 و ع الفندق – حبيت اتمشى , اكتشفت ان الجو عامل زي الساونا ( عرفت احساس الفوطة لما الواحد ينشف فيها ويسيبها في مكان حر ومافيهوش هوا) فاحترمت نفسي ورجعت الفندق ونمت. ع الساعة 2 الصبح صحيت واني ارجع انام – مافيش فايدة – قعدت اتحايل على نفسي – انام واصحى ع الساعة 8 ونص رحت المكتب وانا تلات ارباع نايم – دخلت القاعة : 18 كرسي والناس جاية من تركيا وباكستان والمغرب والسعودية ومصر – بدانا وانا عينيا بتقفل وتفتح وراسي بتقع – يادي الكسوف- بس مش قادر وماباليد حيلة – خبيت نفسي ورا اللي قدامي عشان ماتفضحش- بعد ساعة ونص خدنا اول بريك وانا فقت ف الليل عملت المشوار المعتاد : السينما وكارفور – شفت فيلم اوشنز 13 ونمت نص الفيلم J تاني يوم رحنا المكتب وكملت التدريب وبعد الانتهاء منه اتحركت مع ضياء ورحت معاه على البيت عنده. ف الليل لعبت طاولة معاه ومش عارف فزت عليه ازاي مع انه هو اللي كان بيحركلي الطابات J ولعبنا ايستمياشون وطلعنا حبايب كل واحد فاز مرة – عمرو بيغتنم تواجدي هناك وبيقعد ينكش فيا وهات يا تكسير وضرب ولا بيفرق معاه – جسمه مطاط- وسميرة كانت مشغولة ب ال face book وصاحباتها اللي راحو ف مكان تاني يوم الجمعة تعلمنا درس بليغ من ضياء – مكن اسميه درس العمر- انه عشان تعمل كيلو مكسرات مشكل لازم تجيب كيلو من كل نوع من المكسرات وتشكلهم مع بعض وبكدة هاتكون وفرت ف السعر (شوف ازاي J) صافي ادتني 3 اطواق للطاقة ( واحد للرقبة واتنين للايد الشمال) عشان يزبتوا مستوى الطاقة اللي ف الجسم- على الرغم من اني مابحبش البس حاجة ف رقبتي او في ايدي الا اني وفي سبيل العلم والتجربة قلت مايضرش- طبعا المجتمع اللي احنا عايشين فيه بيعتبر الحاجات دي عيب وتشبه بالنساء وممكن تبقى حرام لان دا اللي اتزرع ف دماغنا من زمان. من 12 سنة تقريبا رحت مع واحد صاحبنا للدكتور ف عيادة الاسرة ف المستشفى – فتح القميص لما الدكتور جه يقيس النبضات ويالهول مارأيت – كان لابس سلسلة فضة – طبعا انا الدنيا اهتزت ف عيني وازاي ومايصحش والواد خرب يا جدعان ولازم اكلمه لعل ربنا يهديه ويعيده الى جادة الصواب ومافضلتش المواجهة المباشرة وقلت اكتبله رسالة احسن – هههههههههههههه والله ايام ومنهم ل الله اللي كانو السبب المهم- لبست الاطواق وشحنت نفسي للاستعداد للمواجهة وبدات اول البشاير ف المطار – مع ان شنطتي صغننة وعدت ف الجهاز بتاع الاشعة الا ان الضابط وقفني على جنب وخد الباسبور – غلاسة كدة – وبعد شوية قالي افتح الشنطة وبعدين قالي مع السلامة J طبعا كل تدريب عليه امتحان يبقى كدة طلعنا بامتحانين ونسبة النجاح لازم تكون 80% او اكتر – عملت الامتحانين يوم الاحد وقلت خليني اجرب واشوف الذاكرة هاتسد ولا لا- وللاسف ماسدتش وماجبتش النسبة المطلوبة ف الاتنين- ممكن ناخد الامتحان تاني بعد مرور 24 ساعة (الامتحان اون لاين ع النت) فقعدت اذاكر والحمد ل الله عديتهم تاني يوم ياترى يا اسوار الطاقة هيكون مردودكم ايه عليا؟ اكتشفت ان حرارتي عند الطوق اللي ف الرقبة دايما زايدة عن باقي الجسم وبديت احس ببوادر دور برد – فكنت باقمعه بالبنادول ومابستسلمش – لغاية يوم التلات – خلصت شغل ع الساعة 7 وروحت ع البيت وهناك بدات الحفلة – اول حاجة عملتها قلعت الاساور وطفيت المكيف وجبت العصير والشوكولاتة والمية وحطيتهم جنبي وطفيت النور واديله ادي حرارة مرتفعة ورعشان ف الجسم وبرد وحر في تمازج عجيب وفقدان للرغبة في كل شيء وعدم القدرة على فعل شيء – لان ابسطها حركة تؤدي الى صداع ظريف لطيف ونوم وصحيان وتوهان وعدم احساس بالوقت وكل حاجة طعمها متغير (بالاحرى طعم فمي انا لان براعم التذوق انضربت) حتى الارض اللي بنام عليها لية سنة بقت قاسية ومش قادر اتحملها الاربع الصبح بعت رسالة لمديري قلتله مش جاي وللموظفين اللي معايا قلتلهم مش جاي ولو في حاجة ضروري يبعتلوي رسالة وحطيت الموايل على خدمة موجود بعدين قفلته نهائيا – وبلبع ف البنادول ونام – حتى الجرايد ماكانشي في الواحد دماغ يقراها ع النت- احلى حاجة ان الدماغ كان معطل والامور ماشية بالتساهيل وبالبركة والواحد كان حاسس انه ريشة في مواجهة الريح وسبحان اللي خلقنا – دبانة تقرفنا في عيشتنا وقدرنا نوصل للمريخ وعدت 36 ساعة بيات شتوي اجباري على خير ودخلنا في فترة النقاهة J
July 03 تخاريفمن أصعب الاشياء ف حياتنا الاتفاق على تعريف محدد لشيء معين زي السعادة او الطوح او الحب او الكره او الخير او الشر وقديما بيقولوا : الفضيلة هي الخصلة الوسطى بين طرفين( يعني : الكرم هو فضيلة لانه بين البخل والسفه, الشجاعة : بين الجبن والتهور وووو) بس حتى دا كلام نسبي لان اللي ممكن انا اشوفه كرم ممكن غيري يشوفه بخل او سفه.... طيب ايه الحل؟ في بعض الاحيان مافيش حل زي مالعالم مختلف على تعريف الارهاب والمقاومة (أحلى سلام لفتح وحماس وربنا يديم المعروف وسلام مربع للجدعان) وبعض الاحيان مش مهم التعريف المهم الفعل – يعني من ال 6 مليار انسان وانسانة كام واحد فيهم عارف تعريف القلب ولا الدورة الدموية ومع كدة عايشين والقلب شغال ومازعلش- ولا الحيوانات : هل القطة ولا انثى الفيل شاغلين بالهم بتعريف الامومة مثلا ؟ ولا غريزتهم هي اللي بتقودهم وياويل اللي يقرب على اولادهم- ولا الجعان هو همه يعرف ايه معنى الشبع ولا همه انه يسد رمقه وياكل؟ طيب انا محبكها ليه وعايز احط التعريفات ؟ لانه في بعض الاحيان الامور بتخش في بعض والواحد مابيبقاش عارف راسه من رجله وسبحان اللي قال : وهل يستوي الذين يعلمون والذين لايعلمون
وهل من الممكن تعريف الشيء بالاتفاق على تعريف عكسه؟ بمعنى : لو انا عرفت الكراهية هل بابقى عرفت الحب؟ زي ماخدنا في الرياضيات : نفي النفي إثبات طيب ايه هي الكراهية؟ هل هي احساس-شعور سلبي تجاه شيء او شخص ما مع عدم تمني الاحتكاك او الاجتماع به – للاسف التعريف دا ساوى بين الامتحانات والاعداء مع الفرق الشاسع بينهم بس هل دا ذنب التعريف؟ التعريف تعريف ومالوش علاقة بالتصرف او الفعل – يعني : تعريف الشبع : هو ملأ البطن : مليتها مية او خضار او كبسة – مليتها بفلوس حلال او حرام- مليتها ف بيتك ولا عند الجيران ولا ف المطعم – مالناش دعوة
طيب هل يبقى تعريف الحب : احساس- شعور ايجابي تجاه شخص او شيء ما مع تمني الاحتكاك او الاجتماع به ومن الطبيعي وجود تناسب طردي بين درجة الحب والشعور والتمني بس كدة..... هل الحب بيزيد وينقص ؟ طبعا يبقى نضيف كلمة متغير ل احساس هل ليه شروط و اركان ومغذيات (تهادو تحابو) – هل لازم يكون متبادل (ياعيني ع اللي حب ولا طالشي)؟ هل هو دائم؟ طيب كلمة ايجابي دي معناها ايه؟ هل الحب بيعتبر محفز للاحسن؟ طيب ايه هو الاحسن ومين يحدد اذا دا هو الاحسن ولا مش الاحسن طيب هل في الحب تنازل وخضوع؟ ولا تكامل وانصهار ؟وهل فيه تملك واستغلال او تضحية و عطاء ؟ وهل مراية الحب عميا ولا مفتحة وبتبقى عميا بمزاجها وهل اللي بيحب شخص ممكن يكرهه؟ طب ليه من الحب ما قتل ( زي ماعملت الدبة اللي الدبانة كانت بتحوم حوالين وش صاحبها ووقفت على مناخيره فجابت حجرة-طوبة وخبطت الدبانة وصاحبها وجابت اجلهم- نيتها سليمة وعن حب) طيب ازاي يتم التعبير عنه؟ هل بالاعلان لجميع الناس ولا هو شيء مخصوص بين الطرفين اللي واقعين في الحب؟ ايه هي اشكال الحب (الوله- العشق – الجنون- التيتم) – طب ايه اللي ممكن يقتل الحب؟ وهل فيه كبرياء و أنانية وكرامة بين المحبين ولا تكبير دماغ؟ وايه هي الية غسيل النفوس بين المحبين؟ وهل فعلا بصلة المحب خروف؟ طيب هل الحب مشروط بتوافر البيئة- الظروف المساعدة لنموه واذا اختفت الظروف دي اختفى الحب؟ وهل اذا دخل الفقر من الباب قفز الحب من الشباك؟
طيب هل ممكن اني احب كل الناس؟ والله العالم مش ممكن- انا ممكن اتمنى الخير للجميع ولا اضمر الشر لهم – بس احب الكل- صعب – طيب راح فين : لايؤمن أحدكم حتى يحب لاخيه مايحب لنفسه؟ ماهو لكل مجتهد نصيب ولو اي حد هيقدم نفس المعطيات اللي انا بقدمها يبقى بتمناله نفس النتايج اللي انا هاوصللها
طب ايه الفرق بين الحب والكره واللامبالاة ؟ طب هل عندك 10 اشخاص تحبهم ويحبوك و هل تتوقع انه ف 10 اشخاص بيكرهوك؟ طيب هل انت بتكره حد؟ وهل لازم الكل يحبك ؟ ولازم ترضي الجميع؟ وهل تضمن انك لو رضيت الجميع هيحبوك؟
وكفاية كدة J June 18 الحد الفاصلملحوظة: هذه المقالة للبشر العاديين وليست للملائكة او اولياء الله الصالحين او اتباع الداي لاما
الحد الفاصل هو حد وهمي لايوجد الا في رأس صاحبه ويختلف من شخص الى اخر باختلاف طبعه وطولة باله والموقف الذي وقع فيه...
تخيل انك كل يوم الصبح وانت طالع من بيتك تلاقي كيس قاذورات امام بيتك؟ ردة فعلك هتبقى ايه? وامتى هتقول لا بقى او انك بتسوق سيارتك واللي قدامك بيسوق على اقل من مهل اللي خلفوه والدنيا رواق عنده وانت مستعجل عندك اجتماع ..... امتى هتبدا تكبسله وتزمرله وتحاول تتجاوزه
او ان في حد معين متعود يستلف منك فلوس ومايرجعهاش وعادي مافيش في وشه دم وبيطلب تاني وتالت- امتى هتقوله لا بقى هو في ايه
او ان شخصا ما عزيز عليك وبتحبه جدا ولكنه يضع عطر شخصي تتضايق من رائحته ولا تستطيع تقبله مع محاولاتك المستمرة وتخبره وترجوه بان يغير عطره او يضع بديلا عنه (من الممكن ان تهديه هذا البديل) ومع ذلك مافيش فايدة- امتى هتقوله بلغ السيل الزبى وسلام ياصاحبي
او ان شخصا ما من المبتزين عاطفيا- ما ان يرى خلقتك الا ويبدا في الشكوى والتذمر والنواح من كل شيء ويسدها في وشك وعندما تقول له بان الحياة صعبة يرد عليك ولا صعبة ولا حاحة بس انت اللي مش عارف تعيش- امتى هتطبق المثل : الباب اللي هيجيلك منه الريح سده واستريح
او مديرك ف الشغل بيستعبط عليك ويخليك تعمل شغله وفي الاخر يقولك : مستواك اليومين دول مش عاجبني والملاحظات كترت على اداءك..... امتى هتقوله : عليك وعلى الشركة اللي شغلتك وتديله اللي فيه النصيب وتطلع
تخيل انك بتتعامل مع حد مش سيد قراره وغيره بيحركه بالريموت الكنترول – امتى هتقولوا: معلش يابن الناس النظام دا ماينفعنيش واتمنالك التوفيق في حياتك وتسرحه باحسان او انك بتشتري سيارة من حد, وبعد لما تتفقوا على كل حاجة يقولك: على فكرة انا صرفت عليها شيء وشويات وديتها الوكالة ودلعتها اخر دلع وياريت يبقى اتخليني اشوفها من وقت للتاني وياريت تعبيها بنزين 95 وياريت لون الميدالية بتاعت المفاتيح يبقى لونها اخضر- امتى هتقوله : هو حد ضربك على ايدك عشان تبيع السيارة- لو عايزة وبتحبها بتبيعها ليه؟ او خليهالك واعمل فيها اللي انت عايزه
قديما قالوا : اتق شر الحليم اذا غضب – اللي هي في مفهومي: اتق شر الحليم اذا حدد الحد الفاصل وبدا يتعامل على هذا الأساس ....
وانا بصراحة احد مشاكلي اني لو رسمت الحد الفاصل واشتغلت على اساسه من الصعب جدا ان اتراحع عنه وتعود المياه لمجاريها حتى لو كانت الخسارة لا تعوض – يعني بالبلدي :لو ركبت دماغي من الصعب اني انزل حتى لو تدمر المعبد على راسي L
"فضرب بينهم بسور له باب. باطنه فيه الرحمة وظاهره من قبله العذاب " لو كان الوزن رجلا لارسلته الى جوانتاناموا ولو كان امراة لزوجتها لواحد في باليمن 3 شهور بديت النظام بتاع الدايت سنتر - بديت ب 1800 كالوري وبعد اسبوعين بقوا 1600 كالوري. انا اشتركت معاهم شهرين بس لاني سافرت كتير ف المرحلة دي ( 3 مرات دبي و مرة مصر و جدة والدمام) امتد الموضوع ل 3 اشهر. التجربة حلوة وصعبة- ف الاول كنت خايف من احساس الحرمان ودا اصعب شيء لان مجرد الفكرة ان ال 3 وجبات موجودين وممنوع تاكل غيرهم عشان ماتبوظشي النظام - فكرة مش لطيفة بس كاي حاجة تانية طالما في نتايج مشجعة الانسان بيستمر وبيستحمل وبيتعود. كنت ف الاول ملتزم تماما بالنظام بتاعهم بس مع الوقت بديت افهمه وافهم تفاعل جسمي معاه وبديت اتصرف....لانه من الصعب الاتزام بيه طول الوقت- والواحد مسافر او معزوم او نفسه جت ف اكلة معينة- وهنا كان دور الرياضة : المشي و الجيم
ف الفترة دي خسيت 8 كيلو (لولللوووللليييييييييييييييييييييييييييييييييييييي) – طبعا لو قعدت احسب الوزن اللي خسيته بالاجمالي هيطلع 13 كيلو لان في كيلوهات الواحد زادها ف السفر واشتغلت اكتر عشان انزلهم. الرياضة حلوة وبتدي احساس بالانتعاش واللياقة بس عايزلها طاقة ذهنية غائبة عني في معظم الاوقات – ما أصعب ان يعيش الانسان بذهنه – بس عايزلها مدوامة ونفس طويل ومثابرة (قطيعة ماحدش بياخدها بالساهل)
بصراحة أنا غير نادم على خوض هذه التجربة بل لايساورني اي شك بانه كان من الممكن خسارة المزيد من الوزن لو قمت بهذه التجربة في ظروف مختلفة...
وخلينا نشوف اخرتها مع الوزن : بندفع عشان نتخن وبندفع عشان نخس L June 14 كان يامكان وع اللي جرى ف شرم للجدعان .........2أحلى حاجة واحنا ف المركب كانوا بيقولوا الله على حلاوتها وجمالها وسبحان الله وتاني لحظة يرموا الحاجات ف المية – تناقض تام بين القول والفعل. ماعلينا بالليل كان عندنا مشوالا ل 1000 ليلة وليلة : عشا ف المطعم المغربي + الصوت و الضوء + تيتو شو طبعا اتاخرنا 45 دقيقة عشان نتحرك وياحرقة دمك يا عٌبد. وصلنا المطعم – الديكور خطير والاكل رائع ....فلسعنا بعد الاكل على خليج نعمة وسبنا الباقي.كنا 7 اشخاص وركبنا البيجو وياعيني على السواقة والعربية. الجو كان حر – تمشينا شوية . بعدين قعدت ف القهوة وهات يابرتقال وموز J
الخميس: الطيارة على 9 ونص الصبح- بلغت الناس انه نتجمع ف البهو ع الساعة 7 و 45 دقيقة ونعمل شيك اوت و ع المطار. ع ال 7 ونص كنت ف البهو وطبعا كنت اول واحد (نمت 3 ساعات بس) ع ال 8 بدات الناس تهل – والحلو انهم متاخرين وعادي عايزين يروحوا المطعم – منتهى الاحساس بالمسؤلية ومراعاة شعور باقي الناس. غير طبعا الباشوات اللي يصحوا متاخرين ويروحوا يفطروا ويسيبوا شنطهم ف الاوضة عشان العمال يجيبوها- وحلني بقى. ع ال 8 ونص تحركنا ووصلنا المطار وطوابير واقلع الحزام والساعة والدبلة والموبايل واعمل البوردنج واطلع ع الطيارة ووصلنا القاهرة. طبعا مطار القاهرة لسة بيتعامل بالاتوبيسات من الطيارة للصالة والاختراع بتاع الممرات المعلقة مش موجود. خدنا الشنطة و على جراند حياة. طلعت ع الاوضة ف الدور ال 30 وارتحت شوية. طبعا كل الاخوة مش المصريين اللي كانوا معايا فاكرين اني حافظ القاهرة وعارف كل شبر فيها وكانوا عايزيني اكون دليلهم السياحي عشان نروح مطاعم: رفاعي, اندريا, بابا عبدو و كشري ابو طارق (عمري مازرت المطاعم دي اساسا ولا اعرف هي فين) وخان الخليل والاهرامات وووو على وقت الغدا اتجمعنا وطلعنا على رفاعي اللي ف المهندسين (يارب يكون اسمه رفاعي وانا مش متلخبط فيه) وطلبوا حمام وانا طلبت موزة- بس برضه المقبلات كانت رائعة ومش عارف ايه سر بابا غنوج في كل المطاعم اللي زرناها- كان احلى طبق فيهم كلهم. طبعا مليت بطني قبل الطبق الرئيسي ولما وصل الحمام قلبنا المطعم ضحك. كان معانا واحد اول مرة ياكله والمنظر ماكانش لطيف وهات ياتريقة وتعليقات J طلعوا على خان الخليلي وانا رجعت الفندق وبعدين نزلت اغير الحجز عشان ارجع صبح الاتنين بدل الجمعة. وع التحرير ولقيت مكتب مصر للطيران وغيرت الحجز ودفعوني غرامة 222 جنيه – منتهى الحلاوة والاستغلال. يعني هم يعملوا فينا اللي هم عايزينه وعااااااااااادي تيجي تغير حجز قبل السفر تدفع غرامة. كل ظالم ليه يوم (الا صحيح : الظلم اللي بيقع علينا من البنوك والمؤسسات الحكومية والخاصة هنتعوض عنه ازاي ف الاخرة ؟ يعني مين اللي هيكون المسؤول ؟ الموظف ؟ ولا المدير العام؟ ولا الوزير ؟ ولا رئيس الوزاراء ولا الرئيس ولا واضع القوانين ؟ ولا يمكن اللي بيحصل دا مش ظلم او يمكن ربنا بيشيل عننا اشياء ف الدنيا مقابل كل دا- الله أعلم. قعدت افتش على بتاع قصب ف المكان اللي كنت فيه ومافيش فايدة. رجعت الفندق وطبعا كنت باستمتع بالمشي عشان اهضم الاكل. ع ال8 اتحركنا على حديقة الازهر – واتعشينا ف مطعم ستديو مصر والجو كان بارد لذيذ والاكل حلو والاجواء لطيفة (طبعا بعض اللي كانوا نازلين مصر لاول مرة واللي معدتهم متدلعة ماستحملوش الاكل بتاعنا وجالهم تلبك). بعد الحديقة البرنامج كان مفتوح فطلعنا – 15 واحد – على مركب ف النيل مع فرقة موسيقية وحركات – انا سبتهم قاعدين ف الدور الارضي (اتخنقت م الشيشة) وطلعت ع الدور الاول- الجو رائع بس بررررررررررررررررررد . رجعنا ع الساعة 1 الصبح تقريبا – دخلت الهارد روك اللي جنب الفندق واتفرجت ع الاجواء وقعدت اضحك ف سري وطلعت (مليان اخوة عرب وكل واحد ماشيلي ب 2 بودي جاردز حواليه ).
الجمعة: السرير واللحاف والمخدات كانو تحفة فحطيت الموبايل ع الصامت وهات يا نووووووووووووم. عملت شيك اوت وحاسبوني بالدولار (لان القانون: غير المصريين ممنوع يدفعوا بالجنيه) J تاكسي وعلى مدينة نصر. عمرو ابن خالتي ومراته وبنته كانو هناك – قعدت معاهم وبديت اطلع ف الحاجات م الشنطة واكتشفت اني نسيت الباسبور ف الاوتيل. كلمتهم وقالولي انهم لقيوه وموجود ف قسم lost & found طلعت ع الفندق تاني مع عمرو وخدت الباسبور (طبعا – دا كان اخر يوم رسمي للناس كلها – يعني مهمتي انتهت). سواق التاكسي كان عايز يدخن, سالنا على ولاعة مافيش- راح زمر للعربية اللي جنبه وقربله وتقريبا لزقوا ف بعض- التاني مد ايده واداله الولاعة وسواقنا اخدها وولع ورجعله الولاعة - كل دا وهم بيسوقوا عادي و في نص الشارع- فينك ياشوماخر تتعلم رجعنا البيت وجبت عصير قصب (اقل من 1 لتر ف اليوم ماينفعش) واتغدينا كشري (كشري المحلات غير الكشري اللي امي الله يرحمها كانت بتعمله)- كشرينا احلى ومليان عدس مش زي بتاع المحلات من كل بستان زهرة. الكشري والقصب ضربوا ف الدماغ وبقيت مش شايف قدامي واضطريت الغي كل المخططات وانام
السبت: سيتي ستارز- نزلت م البيت وجيت اوقف تاكسي- 3 تكاسي اول ماقولهم سيتي ستارز يرفضوا.... طب والحل؟ طلعت ورقة ب 5 جنيه ف ايدي وقلت خليني اجرب – جه التاكسي الرابع : سيتي ستارز؟ بصلي من فوق لتحت رحت قايله 5 جنيه- قالي اركب J هييييييييييييييييييه دخلت المجمع وطبعا فيه بتاع الكشف عن المعادن. طلعت الموبايل والمفاتيح وعديت- طبعا الجهاز صفر عشان الساعة والحزام- قولتلهم مش هاقلعم – هو انا ف مطار.....رجل الامن اداني احلى درس – قالي حط ايدك عليهم وانت بتعدي تحت الجهاز- درس ب 1000 جنيه بصراحة طلعت ع السينما (شفت فيلمين : قص ولزق وانا مش معاهم)- الفيلم الاول : سد نفسي بصراحة لانه بيحكي عن اوضاع الشباب اللي مش لاقيين شغل او شقق او فلوس واختصروهم ب 4 نماذج : اللي عايشها بالطول والعرض ومتكيف ظاهريا مع الوضع واللي طيب جدا وماشي بالبركة والتساهيل واللي تعايشت مع ظروفها مع بعض التجاوزات اللي تخلي للحياة طعم واللي قررت انها تهاجر واشتغلت ع الحلم دا بايديها واسنانها. يعني حاجة تضايق لما يكون مرتب حد 200 جنيه ف الشهر والمبلغ دا نفسه هو تمن وجبة ف مطعم ف 20 دقيقة. بس يا ترى هل لو جمعنا الفلوس اللي موجودة ف الكرة الارضية دلوقتي ووزعناها بالتساوي بين البشر – المشاكل دي هتنحل؟ يعني خلينا نقول 60 تريليون دولار على 6 مليار بني ادم – كل واحد هيطلعله 10000 دولار – هل ياترى حال الكون هينصلح؟ ماظنش لان المسالة ف العقل والتصرف ووزن الامور مش ف الفلوس بس- وياما ناس ورثوا فلوس او ربحوها وطيروها من غير مايعملوا بيها حاجة مفيدة- ماعلينا. الفيلم التاني: خفيف لذيذ زي الطقطوقة J اشتريت كتب كالعادة من فيرجين وقعدت اتمشى عشان اهضم الغدا اللي كلناه ف شيليز ورجعت البيت مشي وطبعا عديت على بتاع القصب وشربت النصيب اليومي
الأحد: البنات وانا قررنا القيام بجولة عائلية- اماكن وبشر ماشفتهمش من 10 سنوات واكتر وانا بطبيعتي الاجتماعيات مش مقطعة نفسها معايا ومابحبش ازور الاماكن اللي ممكن اقابل فيها ناس ماشفتهمش من زمان (يمكن احساس بالرهبة والخجل والتبلد وعدم معرفة ماينبغي فعله- البشر كائنات معقدة او يمكن انا اللي محبكها شوية). تاكسي وطلعنا ع المعصرة, طبعا انا مش عارف المكان ومش فاكره وقاعد اتامل وافكر طول السكة. وصلنا بعد 40 دقيقة والاقي الهوانم بيقولولي السواق خدنا من سكة طويلة وقعد يلف ويدور.....طب ماتكلمتوش ليه واحنا ف العربية؟ مش فاهم ناس كبرت والزمن حفر فيهم اثاره بس طبيعتهم لسة زي ماهي, وناس لسة بتفتح على وش الدنيا وعايزة اللي ياخد بايدها ويديها الامل وناس بتضحي وناس بتفتري وووو عدينا على عمارة ابويا اللي ف المرج (اللي كنا بنقعد فيها لما ننزل اجازة الصيف واخر مرة نزلت فيه كان ف اجازة تالتة ثانوي من 10 سنوات) الشوارع صغرت وازدحمت والذكريات اشتغلت: هنا الفرن اللي كنت باجيب منه العيش, وهنا بتاع الفول والطعمية, ودا المحل اللي كنا بنتصور فيه. ودا بتاع القصب و دا بتاع الفينو واللانشون (زيارات الصيف دي حكايتها حكاية- كنت باوفر طول السنة عشان اشبرق نفسي ب 100 جنيه ف الشهرين بتوع الصيف). دنيا طلعنا ع المترو وخدناه لغاية حدائق الزيتون وزرنا خالي وسلمنا عليه وتعشينا معاهم و بعدين ع البيت لا قصدي على بتاع القصب وبعدين ع البيت
الاتنين : الطيارة على 10 الصبح- سبت البيت على 8 وقفت تاكسي وقولتلوا المطار: تاخد كام؟ قالي ولا يهمك المهم توصل بالسلامة .... اليوم دا كان يوم انتخابات مجلس الشورى والشوارع كانت مليانة عساكر.وصلت المطار واديته 20 جنيه- زعل وقالي ماينفعش- ماكنتش ف مود خناق طلعت 10 كمان واديتهاله-طبعا شركة مصر للطيران هي الوحيدة اللي لازم يشيكوا ع البوردنج لغاية مايطلعوا عينك- واحد قبل ماتخش الصالة بتاعة المغادرة وواحد قبل ماتركب سلم الطيارة وواحد ع الباب- انا اقترح انهم يختموا البوردنج ع الايد ونخلص :) الطيارة كان نصها فاضي وانا القصب قلب بطني - خدت تاكسي و عالوكالة عشان اخد سارة ( من يوم التلات وهم بيرنولي : سيارتك خلصت – كل يوم يرنولي) دفعت التكاليف 1500 ريال وقعدت استنى ف سارة 20 دقيقة (صبرنا يارب) وتوتة توتة خلصت الحدوتة J
حاجة ف الرحلة شغلتلي دماغي- الانسان لما تكون فيه حاجة غلط ف شكله اد ايه بيضحي وبيستحمل ويطنش وبيكبر دماغه ع التعليقات المباشرة وغير المباشرة عشان مايخسرش اللي حواليه- الصداقة او الصحبة بالشكل دا الله الغني عنها ومافيش حاجة تستاهل ان الانسان يطلع من جلده عشان غيره يقبله..... كان يامكان عاللي جرى ف شرم للجدعان....1لكل شيء حلو ضريبة- لبسوني التحضير للرحلة. كان الاعداد لحضور 49 شخص و شخصة واحدة. الاجتماع هيبدأ يوم التلات 5-6 في شرم الشيخ. يوم الخميس 31-5 خلصنا الاتفاق ع الترتيبات مع وكالة السفر ع الساعة 9 مساء. كان عندنا 5 جروبات ( ناس من الرياض , جدة, الدمام, دبي, القاهرة) ولازم ننسق مواعيد الوصول للكل عشان نبدا في وقت واحد. السبت : استلمت التذاكر وبعت بتوع جدة والدمام (ولغاية يوم السبت : اسامي المسافرين لم تكن نهائية والتغييرات شغالة) . اكتشفت ان اغلب الجنسيات العربية مش محتاجة فيزا عشان تدخل مصر وكان دا خبر مريح بصراحة. خلصت الشغل ع الساعة 9 بالليل برضه وكان معاد سفري تاني يوم (الاحد- رحلة 2 ظهرا). جبت الحلاوة بقرة والمعصوب و ع البيت. نقيت أكبر شنطة وارمي الحاجات فيها. الأحد: كان ورايا مشوارين مهمين – اروح البنك عشان احول فلوس واروح الوكالة عشان اسلم سارة لصيانة 20000 كم. ع ال 10 الصبح اتحركت وع البنك. سحبت رقم وقعدت استنى ف دوري ( طبعا باكره السحب اليدوي المباشر لان الامضا بتاعتي صعبة J) جا الدور واديته الطلب – نادى المدير ومضى ع الطلب- بعدين طلب الاقامة وقالي ارتاح شوية. 5 دقايق – 10 دقايق ومافيش حس ولا خبر – ياحج فين الاقامة : مستعجل ورايا حاجات اعملها – قالي : لحظات. بقول ف نفسي : هو انا في قسم- فلوسي وباحولها – انتم مالكم. رحتلوا تاني – قام وجابلي الاقامة وصورة التحويل. طلعت ع الوكالة وسلمت سارة وخدت الشنطة ووقفت تاكسي و ع المطار. كنت أول واحد يوصل لصالة الانتظار – طلعت الكتاب وهات ياقراءة كرسي الطيارة كان في المكان اللي بحبه والحمد لله, وطبعا تاخرنا ف الاقلاع 40 دقيقة والمضيفة شوية شوية هتضرب الناس- كل الموظفين عندنا اللي بيحتكوا بالجمهور عايزلهم تدريييييب مكثف. طبعا لما دخلت الطيارة اكتشفت اني مسافر مع مدرسة أطفال حضانة وتمهيدي ( كي جي 1 و 2 يعني) – 90% من الركاب امهات واطفالهم والرجالة بعتوا مرتاتهم واولادهم وقعدوا هم وممكن يلحقوهم على اخر الاجازة – حل مريح لجميع الاطراف. بعد الغدا الدنيا ظلمت – مكاني كان اقرب كرسي للحمام- مافيش طفل فيكي ياطيارة الا سحب امه وع الحمام- وبقت منطقة الانتظار هي المنطقة اللي حوالي – ياسعدي يا هناي L
وصلت القاهرة وختمت الجواز و 30 دقيقة استنى ف الشنطة (حكاية الشنط دي -لازم يلاقولها حل – ومن عندي موبايل اخر موديل ل اللي يجيب حل عملي ومريح- يللا فكروا). طلعت م المطار كان وفاء وصفاء ونهال في استقبال سيادتي (شكرا يا بنات J). انتقلنا للمطار الداخلي عشان اركب طيارة شرم ( ع الساعة 8 وربع) , قعدنا ف الكفيتريا واديتهم حاجاتهم وهات يا اكل ف المعصوب . طبعا الكافتيريا ربع نجمة ومش عارف ليه المشاريب مابتبقاش ساقعة ف الكافتيريات ف مصر ليه. كان معايا تذاكر الناس اللي من القاهرة وكان لازم يطلعوا معايا على نفس الرحلة - بس اجلوها والتذاكر معايا وعشان يسافروا لازم ياخدوها- طب اسيبهالهم فين؟ بطارية الموبايل فضيت وبقيت مش قادر اتواصل معاهم- سبت التذاكر مع الاخ اللي ف الكافتيريا وخدت اسمه وموبايله. دخلت صالة الانتظار ولقيت رشا هناك – قعدت معاها وخدت موبايلها وقعدت اكلم ف الشباب وانهم يردوا مافيش فايدة- بعت رسالة ليهم وسلمت الامر ل الله. طلعنا ع الطيارة الصغننة اللي عاملة زي الاتوبيس ووصلنا شرم. المطار الجديد حلو بصراحة وكووول. وصلنا الفندق- المنتجع وكان فااااضي وكبييير ولفة طويلة لغاية ماوصلت اوضتي. ع البحر بقى وحركاااات. طبعا الجوع اشتغل – اتفقنا نطلع على خليج نعمة ومافيش تكاسي طبعا- خدنا عربية من الفندق ورحنا للمنطقة الحيوية ف شرم. اخترنا تي جي اي وهات يا اكل – تحفة بصراحة.
الاتنين- صحيت بدري عشان نروح غرفة الاجتماعات ونشيك على كل حاجة: ترتيب الطاولات- الصوت- الاضاءة- الكوبايات- التكييف- البريسنتاشيون- وهات ياتزبيط ( تقول للبشاوات بتوع الفندق انا عايز 1 2 3 يقولك لا 2 1 3 احسن, يا سيدي انا حر – انا ادرى – وطبعا دا اكبر دليل على عظمة العامل المصري. المهم رشا تصرفت معاهم وكل واحد ركز على حاجة. ع الساعة 4 خلصنا واللي نام نام واللي طلع ع البيسين طلع. طبعا ااشمس وانا مش حبايب ف طلعت ريحت للساعة 6 ولحقتهم ع المية- كانت ساقعة شوية ومالحة كتييييييييير واستعدت مهاراتي ف السباحة (اخبط بايدك ورجلك عشان ماتغرقش). طلعنا بعدها على خليج نعمة ورحنا على مطعم ابو السيد- طلبوا حمام وانا طبعا ماليش فيهم بس الاكل كان حلو. رجعنا ع الفندق وبدينا نستقبل ف الوفود والزفة كانت شغالة واخر جمالز ع ال 11 بالليل طلعنا م الفندق... واحد م الجروب اصر يروح على كازينو- ياعم يهديك يرضيك – مافيش فايدة. قالوله ممنوع دخول المصريين ف الاماكن دي- الموضوع ركب ف راسي- ياسلام, اشمعنى. وصلنا- طلبوا اثباتات : اديتهم الاقامة ودخلنا- ها شفتوا ازاي – 3 دقايق واحد م الاستقبال جالي وقالي ممكن لحظة ومشيت معاه- قالي معلش ممنوع دخول المصريين.... ليه ياحج ؟ دا قانون – قعدت اجاعم فيه مع اني مش عايز ادخل ولا العب بس العند وعدم الاقتناع- مارضيوش ارجع تاني وقعدت استنى الجروب وشوف ازاي- يعني الناس من غير اثبات عمرهم مابيصدقوا انه انا مصري – حتى في شرم كل السواقين بيسالوني انت منين , يعني الاثبات اقوى مني ويعني اني مانبني من جنسيتي الا الجانب الاداري فيها. .....
بعدين طلعنا على خليج نعمة, حاولوا يخشوا الهاردروك مانفعش لازم كوبلز واحنا 5 ذكور وانثى واحدة – جربوا ليتل بودا برضه مانفعش (بصراحة احسن ) قعدنا على قهوة طلبت حليب بالموز وهم خدوا اللي فيه النصيب وهات ياضحك. ع الساعة 3 الصبح اتحركت وهم لسة قاعدين (الاجتماع هيبدا كمان 7 ساعات ولازم نطمن على اللمسات النهائية قبله بساعة) التلات: صحيت ع المنبه ودش ع الطاير ولبست البدلة اللي حيلتي وطبعا من غير كرافتة وع المطعم كام دونات وعصير برتقال ( في فندق ق الدنيا يعمل عصير برتقال بودرة مش فريش- اه فيه) وعلى غرفة الاجتماعات والتاكد من انه كله تمام وووووبدينا وانتهينا وعدت على خير والحمدالله.... تغدينا وارتحنا. ف الليل كان عندنا عشاء بدوي ف الصحراء مع الصوت والضوء. مفروض الباص يتحرك ع ال 7 ونص. بلغنا كل الناس واكدنا عليهم . الساعة جت 8 ولسة الناس ماجتش – 8 وربع – 8 ونص اتحركنا باللي كانو موجودين (تقريبا نص العدد) وصلنا -كان في مجسمات للاهرامات وابو الهول ومسلة واخناتون وتوت عنخ امون ورمسيس الثاتي...... تاريخ عظيم بس للاسف حاضر غريب- الصوت كان بيقطع – السي دي اللي كانو مشغلينه بايظ- حاجة تفرس والله. خلصنا الشوو ورحنا ع الخيم عشان العشا والشو المصاحب : التنورة والراقصة الشرقية وأسامة دينجروس (بيمشي على قزاز وبياكله وبيلعب بالنار وحاجات كدة)- برضه الصوت كان بايظ والسي دي كان بيعلق – وقالولي الاكل كان وحش- ماعلينا. رجعنا وخلينا الاتوبيس ينزلنا ف خليج نعمة . كنا 3 – قعدنا نتمشى وبعدين قعدنا ف قهوة. طلبت عصير برتقال وحليب بالموز وشفت الواد بتاع التاتو - طلعت ف دماغي – خدت الكاتالوج ونقيت رسمة – قالي عارف دي بتمثل ايه ؟ رمز الخير والشر (حتى ف التاتو بتتفلسف يا عُبد). احلى اغنية كانت جانا الهوا لعبدالحليم ومنه ل الله بتاع العنب والبلح.
الاربع: رحلة بحرية لراس محمد ومفروض نتحرك 8 ونص الصبح- طبعا تاخير نص ساعة عادي- تقول بتتعامل مع عيال وفعلا من أمن العقوبة أساء الأدب. وصلنا المرسى وكنت لابس الشورت وشيرت (علاقي) عشان التاتو يبان. واحد من الشلة قالي ان التاتو حرام واه فعل يستاهل اللعن- انا اذبهليت- يا جدعان دا حنة وبتروح بعد اسبوع والمية بتمسحها- وقعدت افكر لو تاتو يستحق اللعن امال كل الظلمة والحرامية والفاسدين واكلين حقوق الناس واللي بيفجروا المساجد والابرياء واللي يقتتلوا ع السلطة وووووو هياخدوا ايه ويستاهلوا ايه – مالكم كيف تحكمون. تفرقنا على مركبين واختارتلي حتة مافيهاش شمس وشغلت المزيكا ف ودني واسترخيت. عطشت- كان فيه مية وكوكا بس لازم يكونوا سخنين (ماينفعش يكونوا ساقعين- مع انهم عارفين انه احنا طالعين معاهم- بس هو دا عدم الاهتمام بالتفاصيل اللي بتفرق ف الاخر بين الممتاز والعادي). وقف المركب ف منطقة ف المية للي عايز يسبح ويعمل سنوركنلج (طبعا انا كنت اشتريت كريم ضد الشمس لاني من سنتين اتحرقت ف نفس المشوار دا ولا ينبغي ان احرق من نفس الشمس مرتين) – الاغراء زاد ونزلت المية – جميلة ومنعشة ومالحة- طبعا في ناس لابيعجبها العجب ولا الصيام ف رجب ولا حتى ف محرم- لا اكل عاجب ولا فندق عاجب ولا حتى سمك واعشاب مرجانية عاجب – طبعا لما تلاقي حد كدة لازم تعرف انه ...... ولا بلاش. واحد من الشباب شعره كان غزير فعلقت عليه- ردوا عليا بحديث معناه : بارك الله ف الرجل المشعر- حاجبي ارتفع بطريقة لا ارادية وسالت عن الرواة وصحة الحديث وقالولي دا حديث صحيح- قولتلهم ياجماعة طب بالعقل هل دا عدل؟ هل الانسان بينقي طبيعة الشعر ف جسمه؟ مش ربنا اللي خلقنا كدة ف ازاي يُدعى بالبركة لصنف على حساب أصناف في شيء لادخل لهذه الاصناف به؟ يعني كلامهم دا على وزن : ُبورك من طولهم 180 سم او من كانت عيونهم خضراء (مش كفاية حكاية ارضاع الكبير دي)- ماعلينا.
......يتبع May 17 الروادامبارح كان عمري عشرين, لا لا قصدي امبارح كنت ف الجيم (اخيرا كسرت الكسل) وقاعد العب ع التريد ميل ( الة المشي السريع) لعل الرياضة تساعد على حرق الكالوريهات وبالتلي خسارة الوزن اسرع..... التريد ميل دي فيها سرعات متعددة وبتتحكم ف الوقت اللي عايز تستخدمها فيه وبتحسبلك عدد الكالوريهات اللي اتحرقت..... عادة بابدا على سرعة 6 كم-ساعة وبعدين بازيدها لغاية 6.7 وبعدين باهرول ع 10.3. تحت عندنا 3 الات ومن ملاحظتي للناس اللي بيلعبوا عليها في نوعين مالهمش تالت: الغلبان – اللي يبدا على 4.5 ولو سخن يزيدها ل 5.5 - النوع التاني : المفتري – اللي ياخدها كلها هرولة ع ال 8 وطالع طبعا انا بديت اهرول تدريجيا : دقيقتين- 3 – 5 – 7 – 8 – 10 لغاية ماوصلت ل 15دقيقة من ال 40
نرجع لامبارح, وانا ع الجهاز جه واحد ع الجهاز اللي جنبي- كبير فالسن ( فوق ال 40 ) ولابس نظارات طبية اللي هي زي التليفزيون وبدلة رياضة كاملة- كان واضح انه اول مرة يستعمل الالة لان صاحبه كان قاعد يشرحله عليها- كان خايف وماسك ف القوائم بتاعة الالة وظهره منحني ( قدامنا في مرايات)....بدا على سرعة 1 وكان كل شوية يبصلي ويبص للالة اللي انا بالعب عليها ( وانا عامل اني مش واخد بالي) كل شوية شجاعته كانت بتزيد ويزود السرعة- زودها ل 2 , 3 , 4, 5 لغاية ماوصل ل 6.8 (زيي بالضبط) بعدين استقلها فراح زودها ل 7.2 .....
خلاصة الموضوع: لو الراجل دا كان واقف جنب واحد حاطط السرعة على 4 كان احتمال كبير انه يحط ف دماغه ان ال 4 دي هي اصعب حاجة وهي الهدف الاسمى والصعب المنال وكان ممكن يقنع نفسه ان ال 4 دي هي اخر مايستطيع تحقيقه. طبعا هو هيصحى تاني يوم متكسر ويمكن مش هيروح الشغل بس المهم انه تعلم
الموضوع دا حصلي ف الجامعة – كان اقصى طموحي اني اجيب معدل اعلى من صعصع (3.2 لو فاكر صح) واشتغلت ع الاساس دا – وقدرت اني ف اول سنة اجيب اعلى منه (حاجة زي 3.3)- بعدين اتعرفت على طلاب اشطر وبياخدوا معدلات اعلى ( ف قلت لنفسي وهم احسن مني في ايه) وتقريبا اخر سنة ونص معدلي فيهم كان فوق ال 3.8 وبالتالي اتخرجت 3.66
تخيلوا سباق ال 100 متر لو مافيش رقم قياسي بيتسجل باسم لاعب معين ايه المتعة ف عدم تحطيمه – ازاي ممكن اي لاعب يقول لنفسه انا هابقى اسرع واحد ف العالم او حتى يقول انا لسة ف طاقتي اني اعمل احسن من كدة - يعني زي مابيقولوا: How good is good and how bad is bad
عشان كدة لازم ابعت رسالة شكروتقدير لكل الرواد اللي ف الدنيا: الرواد اللي فتحوا الطرق قدامنا ونوروهم وادونا القدرة ان احنا ننفاسهم ونطورهم او حتى نغلبهم ( ايه المتعة لو اكتشفت حاجة وسيبتها لنفسك وماستفدش منها غيرك) والحياة دي تراكمية وكل حد بياخد م اللي قبله ( اما ايجابا فيتعلم منه او سلبا ف مايعملش زيه) وسنة الحياة التغيير والتطور ومش شرط تكون الريادة في اختراعات عظيمة للبشرية – ممكن تبقى ف حاجة بسيطة زي اكلة مثلا او فكرة خلابة او او – وممكن الواحد يكون قدوة لحد بيراقبه وبياخد منه مثل وبيستمد منه القوة وهو مش عارف
وفعلا بدل ان تلعن الظلام اقد شمعة ولو ماعرفتش حاول و حاول وحاول ومن سار على الدرب وصل ولازم نفر ف الحل مش ف المشكلة
أيها الرواد شكرا J May 08 صفوانيلا ابدا اجراءات الحجز عشان هتسافر دبي...... مين انا؟ اه انت امال خيالك..... بصوا- انتم عملتوها في قبل كدة وماسافرتش ف مش ناقص دوشة ومش عايز اطلع على دبي قعدت احاول اعصلج الامور عشان مانزلش بس سبق السيف العذل وفاء قالت حلاوة بقرة ( موضوعها سهل- روح البقالة واشتري) صافي وصفاء عايزين تميس ومعصوب : استنيت ليوم السفر ( يوم الاحد : 29-4) و ع الساعة 11 و ربع سبت المكتب و على المطعم عشان اجيب التميس والمعصوب- وصلت ع الساعة 11 و 35 دقيقة ولقيتهم بيبتسموا: فيه ايه يا جماعة: بكل الغباء اللي ف الدنيا ( من غير غيبة والله) احنا مابنبعهمش بعد ال 11 و30 -----ياسلاااااااااااااااااااااااااام – معلش سامحوني – الجهل وحش سيبتهم ورحت مكان تاني وتالت- نفس الكلام- طب يا جماعة هتفتحوا امتى تاني- ع الساعة 7- طيارتي كانت ع الساعة 5 يعني انسوا - وكانت درجة رجال اعمال – صياعة بقى وصلت ع الكراون بلازا وربنا يعمر بيتها الريسيبشونست عملتلي اب جريد وادتني اوضة ف الدور ال 23 – اخر دور الاتنين- احلى حاجة ف الفندق دا ان المكتب جنبه على طووول- ع الشغل- بعدين اتغدينا ف تي جي اي ف الليل رحت شفت فيلم the good shepherded وطلعت ف نصه لاني كنت عايز اناااااااااام التلات: شغل برضه وطابعين ماليش مكتب وقاعد الف من مكتي لمكتب عشان اخلص شغلي- برضه تغديت ف تي جي اي وبعدين طلعت مول الامارات واتمشيت ف حبيبي كارفور ( والله فرق شاسع بين كارفور اللي هنا واللي هناك- فرق ف الروح والاضاءة والترتيب ووووو) وبعدين دخلت فيلم تاكسي 4 وجبت ناتشوز J الفيلم كان غبي وحاولت استمتع بيه ماقدرتش الاربع: برضه شغل بس اتغديت ف ماكدونالدز و ع الساعة 3 رحت الفندق وعملت شيك اوت وعلى بيت ضياء اكل بقى وحاجات- بعدين ضربت البوز الاليم مش عارف ليه وفي ايه يابني؟ مافيش- حد داسلك على طرف؟ هو في حد يستجري- وعدت الليلة الخميس: البنات وانا هنسافر النهاردة, هم على مصر وانا ع الرياض..... المخطط كان اني اوصل صافي واخد العربية بعدين ارجع اخد البنات ومن ثم نمر على صافي وهي توصلنا للمطار J كان في فرق 4 ساعات بين رحلتي ورحلتهم- المهم وانا باخد العربية اكتشفوا مشكلة التاشيرة وسحبوا ضياء ياعيني وداخوا السبع دوخات واحنا دخنا معاهم....... ع الساعة 2 كلنا ف المطار – البنات ركبوا واحنا رحنا الحلاب نتغدى – خدتلي شوربة عدس رجعت المطار ع الساعة 3 ونص ودخلت صالة رجال الاعمال وياعيني ع الصياعة- نعيم مقيم- مالذ وطاب : زبادي فواكه- ايس كريم- مكسرات- ساندوتشات تونة- كرواسون- فواكه- عالم تاني- احمدك يارب عملتلي طبق بعدين اتجعصت على كرسي ونمت نوم متقطع لمدة ساعة تقريبا- رحت كملت نقنقة و ع الطيارة – من احلى الحاجات ف مطار دبي ان الركاب مابتطلعش عينهم عشان يركبوا الطيارة- قعدت ع الكرسي وجبت الشرق الاوسط وبديت اقرا..... لقيت واحدة ست ومعاها طفل صغير ( سنة ونص الى سنتين) وماعرفتش احدد الجنسية- وانا مالي....الواد بدا يتعفرت ويرمي كل حاجة وامه متبهدلة معاه وبتكلمه بالانجليزي (حاجة زي : صفوان -نوتي بوي) وانا قاعد اكتم ف ضحكتي والعب معاه من تحت لتحت – ...... شيء غريب اني كنت متقبل دوشة الواد وحركاته ودا خلاني افكر لو الولد دا ابني هل كنت هاقعد العب معاه كدة ومش فارق معايا حاجة ولا هاقعد اجز على اسناني واقول لامه: سكتي ابنك ماتفضحيناش ف الطيارة J زي لما يكون عندك ضيوف ف البيت وفي اطفال ويقوم حد منهم يوقع عصير ع الارض: طبعا هتاخد الامور بكل روح رياضية وعادي وفداك وووو طب لو كان دا طفلك وفي بيتك هتعمل ايه؟ المضيفين قعدوا يدلعوا ف الواد: شيبسي على جيلبر على مية والعجيب ان امه كلت وجبتها عادي وقدرت توافق بين دوشته وزنه وحركته وبين انها تاكل- الكرسي بتاعي الشاشة الخاصة بيه كان بتقعد تطلع لوحدها (القفل كان مكسور) وانا انزل فيها, الباشا عجبته اللعبة وكل مانزلها تحت يصوت عشان تطلع تاني ويحاول ينزلها هوة...... طبعا انا دايما بفضل اقعد ع الممر وبحب وقت الهبوط ابص من النافذة- لحظة احتكاك العجلات بالارض والرجة اللي بتحصل ف الطيارة : ام صفوان وبحركة انسيابية لاشعورية حضنت ابنها وشدته اليها- يمكن عشان تحميه – يمكن عشان تحسسه ب الامان او تحس هي بيه- السؤال: صفوان باشا حس باللي امه عملته وياترى مخه الصغير ترجمه ازاي وياترى هل ذاكرته هتحتفظ بالموقف دا ولا لا؟ (الله يرحمك يا امي ويحسن اليك) - الحمدلله وزني مازدش كتير ف دبي وخسيت الزيادة ف يوم واحد - مامرضتش ف دبي J بس الاعراض طلعت لي النهاردة - مش قادر ارجع ع الجيم تاني بعد السفرة دي L - لغاية دلوقتي مش عارف كل الفوط اللي ف الفنادق فايدتهم ايه - اوحش حاجة ف غرف الفنادق انه مافبش ضوء مركزي ف نص الغرفة والاضاءة دايما بتبقى ضعيفة دا غبر القنوات اللي بتكون موجودة واحلى حاجة التحكم ف الاضاءة وانت ع السرير J - المطارات كانت فاااااضية ومافيش طوابير ع الجوازات وياترى ياصفوان كان اسمك صفوان ولا لأ؟ April 28 الصيانةاشتريت قميص من سنتين بمبلغ زهيد من محل عادي لانه عجبني شكله ولونه ومقاسه كان حلو...... بعد فترة اكتشفت اني دفعت فلوس عشان اغسله واكويه اكتر من سعره لان القميص دا بيستاهل.... مع اني اشتريت قمصان غيره احلى منه واغلى بس عمري حتى مالبستهم ولا جيت جنبهم.... ودا اللي اوحالي بفكرة البلوج دا J يعني ممكن حاجة (او شخص) ماتكلفش حاجة وتسعدك لدرجة انك تصرف الغالي عشان تحتفظ بيها وحاجة (او شخص) تكلفك ومع كدة ماتفكرش فيها ولا تلجأ ليها يعني الانسان لما بيشتري بيت مش بيدفع تمن الارض وبعدين تمن العمار والتشطيب والعفش وووووو وبعد دا كله فاتورة الكهربا والمية والتليفون والدش والانترنت والبواب – يعني: مش كونك اشتريت البيت تبقى مصاريفك خلصت وهتبقى باشا- نفس الكلام ع العربية : غسيل وتغيير زيت وتعبية بنزين وكشف دوري وتأمين ووووو- طيب انا عاوز اقول ايه؟ اذا احنا بنعمل كدة مع الحاجات اللي اشتريناها وبقت ملكنا لييييه مابنعملش كدة مع بعض؟ لييه مابنعملش صيانة في علاقاتنا مع بعض؟ ليه- زي مابيقولوا بالانجليزي- بناخد بعض for granted ليه الزوج بيتوقع انه طالما اتزوج مراته وبقت معاه ف البيت يبقى مش لازم يجدد علاقته بيها كل فترة ويعملها صيانة دورية؟ ليه الاخوة بيتعاملوا مع بعض على اساس الوضع القائم بينهم من زمان ومايحاولوش يعملوا soft ware upgrade او حتى يغيروا ال hard ware نفسه ليه الناس بتحب بعض وهم بعاد عن بعض ولكن لما يعيشوا مع بعض فترة اطول تبدا الخلافات و المشاكل وريحتها تطلع؟ مشكلة الصيانة انه كلا الطرفين لازم يقتنعوا بيها ويعملوها سوى والا بتبقى زي ريش المروحة اللي بيجروا ورا بعض بس عمرهم ماهيلمسوا بعض طب ايه هي أعمال الصيانة: كلمة شكر او عرفان او تقدير, هدية بسيطة, تلبية طلب من غير ماتحسس اللي قدامك انه جبتله العيد ف الانجر, دعوة م القلب, دفاع عنه ف ظهره, ذكره بالخير , ايتسامة صادقة, وووووو اللي يفكر مايتوهش وعلى راي اللي قال: عنوان بيتنا زي ماكان – بس انت اللي نسيت العنوان او حتى رحت لعنوان غلط وفي الاخر: انظروا من يتحدث J April 26 ما أحلى العودة إليهاكان مفروض اروح دبي ف أول ابريل 2007 في زيارة شغل وبعد استلمت تذكرة الطيران و ف نفس يوم السفر اتلغت السفرة وخدت خازوق حلو (اكلت الضرب باللبناني). طبعا انا بحب دبي وعيشة دبي وكون ضياء وعيلته واخواتي البنات عنده خلاني احبها زيادة..... المهم في قعدة تجلي بيني وبين نفسي خدت القرار : اخدلي يومين اجازة مع الويك اند واطلع على دبي نشوف العيلة ونروح السينما واشتري عطور ( من فترة كل العطور اللي باشتريها من دبي مع انها اغلى بس انا بستمتع بالتسوق هناك) واكل مكرونة وناتشوز والعب كوتشينة ووووو دخلت ع النت (ربنا يخليها يا رب) وعملت الحجز ودفعت الفلوس واستلمت التذكرة وشف الكرسي بتاعي كمان وعملت البوردنج..... امل وأخوها حسام وصلوني ع المطار (ميرسي) ورحت داخل على بتاع الجوازات (طبعا عندي تاشيرة دخول وخروج متعددة) فسالني ع البوردينج اديته الورقة اللي طبعتها قالي ماينفعش لازم تاخد الكرت منهم- رجعت للصالة ورحت لمكتب الامارات وخدت الكارت (كان معايا شنطة صغيرة فخدتها معايا ع الطيارة) ورجعت للجوازات وبعدين التفتيش (اكتر حاجة بكرهها ف السفر) وقلعنا ولبسنا ورحت على صالة السفر وطبعا الموبايل ف ودني وعايش حياتي. نادوا ع الطيارة ولقيت امم واقفة (اكتر من نص الطيارة شغالات واكتشفت بعدين انه دي رحلة ترانزيت بالنسبة ليهم- الحمد لله الذي فضلني على كثير من خلقه) – الطابور طويييييييييييل ومافيش مكان للوقوف وسدينا الصالة ع الناس التانية – المهم دخلت الطيارة ورحت ع الكرسي بتاعي (لازم ممر وياسلام لو مخرج كمان تبقى اخر بهللة) – كان ممر بس, طلعت مجلتين سبتهم معايا وبديت اقرا واسمع.....وصلنا دبي ووقفنا ف الطيارة يجي 10 دقايق لغاية مايفتحوا الابواب والناس اللي قدامنا تنزل (رابع حاجة بكرهها ف السفر) طلعت م الطيارة وجري ع المطار (تحفة) وباستغل الفرصة عشان امشي بسرعة واحرق كالوريهات – وصلت صالة الجوازات واشتريت تاشيرة وعبيت الفورمة واختتلي طابور اقف فيه (تاني حاجة بكرهها ف السفر) - خلصت الاجراءات بعد نص ساعة تقريبا وطلعت م المطار وكان صافي ووفاء مستنياني (ميرسي) وفاء كانت محمرة وخاسة (ايه الحلاوة دي) ووصلت ع البيت ع الساعة 12 مساء تقريبا..... اخدت اوضة عمرو (اسفين ياسيد عمرو) بس مانمتش فيها الا ع الساعة 8 الصبح ( قعدت اتكلم انا والبنات ف مواضيع شتى) . صحيت على 3 العصر وعشت حياتي, طلعت ميركاتو واكلت سينابون ورحت السنيما – فيلم : Music & Lyrics لذيذ وخفيف بس وانا ف نص الفيلم جنبي اليمين ضرب- فيه يا بني الله اعلم- استحملت بقية الفيلم و ع البيت.... صافي مرت ع الصيدلية وجابتي الدوا (ميرسي) وبقيت باحس ببوادر برد – كله من المكيف : مستحيل نعيش معه او من غيره. وقضيت الليلة مش قادر اتحرك وتعبان L واكتشفت ان كل مرة انزل فيها دبي لازم يحصل لي حاجة- غريييييب الالم خف والمكرونة اشتغلت (دايت مييييييييييييييييييين انسى) والهوان كانوا عايزين يتغدوا ف فدركرز, طلعنا عليه وقعدنا نفتش لغاية ماوصلناله – بعدين كانوا عايزين يحلوا بسينابون – فطلعنا على سيتي سنتر.... ف الليل- رحت اشتري العطور وبعدين طلعت ع الامارات مول عشان اشوف فيلم perfect stranger اللي ممكن يتلخص بالحكمة: من الممكن ان تكذب على بعض الناس كل الوقت ومن الممكن ان تكذب عل كل الناس بعض الوقت لكن من المستحيل ان تكذب على كل الناس كل الوقت. رجعت البيت ولعبنا كوتشينة واكلت شايب الكبة مفتوح 3 مرات (شكرا ياصفاء) ونمت. الخميس الصبح- صحيت بدري عشان اقدر اخد العربية وبعدين طلعت على ستي سنتر ورحت حبيبي كارفور وكان فاااضي فعشت حياتي جوة وفطرت واشتريت وطلعت ع السينيما اتفرجت على wild hogs كوميدي ظريف عن الصداقة والناس اللي فجاة بتنتبه انها كبرت ف السن...بعدين طلعت على ابن بطوطة وشفت فيلم the painted veil رومانسي انساني خفيف ( اخيرا اكلت ناتشوز وجبنة وسوص ف الفيلم دا). ورجعت ع البيت اكلت ونمت شوية وضياء شرف ف طلعنا نلعب لغاية الليل ما ليل.... الجمعة : طلعنا على بيتزا هت وخطبت سميرة بنت ضياء (سوري يا امل) وقررنا ان احنا هنعيش ف المريخ. بعدين ع المطار فاشتريت شوية كتب وطلعت ع الطيارة اسمع و اقرا وصلت الرياض خدت تاكسي و ع البيييت – اجازة حلوة وتغيير مطلوب ودايت باظ وفلوس اتصرفت اكتشفت ان وزني زاد تقريبا 3 كيلو ف دبي بس الحمد لله خسيتهم تاني ... ----------------------------------------------------- - بعد مرور 5 اسابيع على الدايت بتاعي وعلى الرغم من كل العك والتجاوزات اللي عملتها- خسيت 6 كيلو وشكرا للرياضة والجيم (بحرق 500 كالوري تقريبا ف الجيم كل يوم) - سارة حبيبتي عادت لاحضاني يوم الاحد سليمة معافاة- عايزلها تنظيف داخلي بس- حياتي من غيرك يا سارة بهدلة وشحططة وعكننة وحرقة دم وقلة قيمة J April 22 متفرقاتأتمنى فوز رويال بالانتخابات الرئاسية الفرنسية خطوة جيدة: تعيين قضاة - نساء- في مصر (وأن تأتي متاخرا خير من الا تأتي)ة أتمنى فوز تشيلسي بالدوري الانجليزي وبرشلونة بالدوري الاسباني وبان يصبح محمد زيدان هداف الدوري الالماني وميلان بدوري الابطال أتمنى مشاهدة مباراة الاهلي وبرشلونة ف الاستاد أحلى اعلانات دعائية: اعلان دوف عن الجمال الحقيقي, اعلانات سنكرز, اعلانات موبينيل (مستحيل), اعلان شريف منير عن اللبن الرايب, اعلان شوكولاتة جالكسي:سينزي, بعض اعلانات موبايلي أسوء اعلانات: داناو, كنتاكي زنجر, أحلى 3 أغنيات (حاليا): بين ايديك, الله عليكي ياطيبة واول باي ماي سيلف أحلى مسلسل كوميدي : فريندز أحلى فاكهة: الموز والتمر والبطيخ أحلى عصير: القصب والجوافة والموز أحلى فترة ف اليوم: بعد الفجر للى مابعد طلوع الشمس بساعة برنامج القاهرة اليوم, فقد كثيرا من بريقه أسعد أيامي لم أعشها بعد
April 21 مين أنا؟شكرا يا فوفة ع الموقع
عدد معين من الاسئلة والاجابة يا صح يا غلط - صحيح بعض الاسئلة كانت اجابتها مالصعب ان تكون صح او غلط - بس جاوبنا وخلصنا- النتايج بتصرف موجودة تحت
تحليل الشخصية في أحسن حالاتها أنت إنسان جاد جدا صاحب قرار ورأي على قدر كبير من المسؤولية تجاه نفسك وعائلتك وحتى عملك تتحمل عبء كل من تظن أنك مسؤول عنه. لو كان هناك جملة واحدة يمكن أن تجمل وصفك فهي ببساطة أنك إنسان يعتمد عليه دون أدنى شك في قيامه بما هو مطلوب منه في حدود جهده البشري. توفير الأمن والحماية من نوائب الدهر وصروفه ومن مشاكل الحياة ومتاعبها لمن تحب من أقرباء ومعارف أو حتى مؤسسات أو أماكن عمل هو أمر مهم تظن أن من واجبك القيام به تجاهم. أنت على قدر كبير من الحنكة والقدرة على الفحص والاختبار والتدقيق وكأنك مفتش أو مدقق لا تغيب عنه شاردة أو واردة من الناس أو حتى الأشياء . هذه الطبيعة فيك تجعلك تفكر وتختبر وتدقق كثيرا قبل أن تتخذ صديقا جديدا لك وكنتيجة لها أيضا يبدو عليك الشك ويلاحظه الناس عليك فيتهمونك أنك إنسان صعب وقد يصل الاتهام في بعض الأحيان أنك معقد وفظ. من الأمور التي تميز شخصيتك أيضا أنك إنسان عادل بل شديد العدل تحب في العادة أن تعطي كل ذي حق حقه وتظن أن الناس متساويين لذلك أنت لا تجامل في الغالب أبدا ولا تحابي حتى لو كان الأمر يخصك أو أحد معارفك أو أقرباءك وهذا أهم سبب لاتهامك بأنك معقد شديد؛ الأمر الذي قد يجعلك تتضايق بعض الشيء من الناس الذين لا يفهمون هذا النوع الراقي من العدل ولكن الحمد لله فأنت لا تتأثر كثيرا بذلك وعادة ما تقول لنفسك لا يهم طالما أنني على الحق فليغضبوا كما يشاءوا. ليس هناك ما تلتزم به في حياتك أكثر من كلمتك فكلمتك هي عهدك وهي أشد عندك من العقود والمواثيق ولكن للأسف كثير ممن تتعامل معهم لا يقدرون ذلك وقد تستغرب عندما يخلف أحدهم عهده فأنت لا تعرف لماذا لا يلتزم الناس بعهودهم. العادات والتقاليد من الأمور المهمة جدا في حياتك وتقدرها بشكل كبير وتتضايق من التفسخ والانحلال والتنصل من تلك العادات والتقليد والقيم الموروثة الجميلة التي تذكر بالماضي الرائع وذكرياته البريئة. الكلام المنمق المصفف والملابس الفارهة المبالغة فيها لا تعجبك بل أنك قد لا تثق في من يقولها أو يلبسها وقد ترتاب أو تشك فيه. فأنت شخص بسيط في ملبسك لا تهتم كثيرا بالمبالغة في الأناقة , كلماتك صريحة مباشرة وواضحة تقصد كل كلمة تقولها وتعنيها تماما وتظن أن الآخرين مثلك الأمر الذي يسبب لك ولهم الكثير من المتاعب لأن كثير من الناس لا يعنون ما يقولون! أخيرا أنت إنسان مرتب منظم ذو تفكير منطقي محايد في أحكامك وحقاني كما يقول وقد تصح فيك مقولة عمر رضي الله عنه " إيه يا حق لم تترك لي صاحبا"
ابرز العيوب في شخصيتك:
· الخوف من المستقبل وما قد يجد من المصائب التي قد تؤثر على عليك أو على من تحب من صروف وتقلبات الدهر ومشاكل الحياة والمبالغة في البحث عن الأمن والاستقرار لك ولمن حولك
· الإخفاق في ملاحظة أو تقدير احتياجات الآخرين للتعاطف ولتأكيد المشاعر نحوهم والتواصل معهم وزياراتهم وحاجتهم للتقدير والثناء وعدم أعطاء المشاعر بشكل عام اهتماماً كبيراً على الرغم من خطورة هذا الأمر في كثير من الأوقات والذي قد يجعل من حولك يتهمك بالبرود أو الانعزال
· المبالغة في الثقة في النفس والاعتماد عليها فقط في بعض الأحيان ونسيان أن التوفيق بيد الله وحده
· عدم القدرة على التسامح والعفو والنسيان بسهولة وأخذ الأمور بصفة شخصية في بعض الأحيان وتصفية الحسابات
· الإخفاق في النظر إلى العواقب بعيدة المدى لما تقرره والاكتفاء بإصدار الأحكام على أساس تحليلك المنطقي للحظة الراهنة وهذا قد يورطك في كثير مما لا تحمد عقباه.
عدم و جود البيئة المناسبة:
1. يصبح متصلباً ومتحكماً لا يتسامح مع من لا يتبع التعليمات
2. يصبح ناقداً لاذعاً بشكل فج وقاسي وينصب نفسه حكماً على ما يقوم به الآخرون.
3. يصبح من الصعب عليه توكيل أي أحد للقيام بالعمل ولا يثق بأن الشخص آخر يستطيع أن يعمل المهمة بشكل صحيح
----------------------------------------------------------------------------------------------------------------------------------------------------------------------
أتفق مع هذا التحليل بنسبة 70% - المميزات موجودة في (ماعدا حكاية العادات والتقاليد دي) ولكن انا شايف انه ف نقاط اخرى لم يتطرق اليها التحليل
بالنسبة للعيوب: اتفق مع النقطة التالتة والرابعة وجزء من التانية
بالنسبة للبيئة المناسبة : اتفق معاها 90% April 15 بأي ذنب خُبطت 2وصلت المكتب, ياشباب ممكن المعقب يروح بدالي ويطلع التقرير وورقة الاصلاح – لا مش ممكن. كان ورايا شغل مستعجل ولازم اخلصه.....اشتغلت و ع الساعة 11 الا تلت اتحركت..... رحت على مكتب المرور- ودا عبارة عن مباني متعددة متجمعة في محيط واحد. أكبر هم طبعا ان الواحد يلاقي موقف ل سارة. لفيت لغيت مالقيت واحد قبل اخر الدنيا بشوية..... كنت مصور كل حاجة- الرخصة والاستمارة والاقامة والتامين.... ماعرفتش اروح اي مبنى ومافيش حد اساله –كل واحد ف حاله- لقيت مبنى مكتوب عليه الحوادث- دخلته – سلم : طلعته, اوضه فيها ناس: دخلتها- الناس واقفين قدام واحد قدامه كمبيوتر: وقفت معاهم- بيدولوا الرخصة – مديت ايدي واديتوا الرخصة (احدى فوائد الطول)- دخل رقم لوحة سارة ع الكمبيوتر واداني رقم المحضر وأشرلي ع المكتب اللي جنبه. كان عسكري كبير شوية ف السن وناس حواليه من كل مكان وهو لايص شوية ومش عارف يعمل ايه .... بديت اقلق عشان وقت صلاة الظهر قرب وخايف ياخدو بريك ساعة يبقى اليوم باظ- فجأة دخل عسكري تاني وقال لنا اقعدوا وكتب اسامينا على ورقة واداها للعسكري الاولاني واللي ينادي اسمه يروح له (يعني القطاع الخاص حل المشكلة دي من زمان وبقى في صالات مرتبة ونظام ارقام وكراسي عدلة- صحيح العقلية لسة زي ماهي- بس قضا أخف من قضا). نادى على اسمي : رحتله – راجع ورقي وقالي طيب اقعد لما اخلص اللي قدامي- قلتله : اساعدك – اعيبلك التقرير او ورقة الاصلاح – قالي لا اقعد انت. نادى عسكري تاني عشان يعبي الورق واداهملي وقالي اختمه من واحد ف اخر المكتب بعدين امضيه من حد ف الدور اللي فوق (فين ودنك يا جحا؟ فكروني بايام عمر افندي: لما كنت تشوف الحاجة اللي عايز تشتريها ف مكان وتحاسب ف مكان وتستلم البضاعة من مكان- يعني فيها ايه لو كان الموضوع كله اون لاين: دخل رقم الاقامة واطبع التقرير وورقة الاصلاح- خلصنا. يعني انا من يومين دخلت ع النت ع الامارات للطيران , حجزت ودفعت الفلوس وخدت التذكرة وانا قاعد ع "الفرشة بتاعتي" )
ماعلينا- طلعت وانا بزغرت الخطوة الجاية كانت اني اروح مكتب التامين ف مخرج 8 عشان اديهم الاوراق دي رحت كملت شغل. ع الساعة 3 ونص تحركت. دخلت خدت رقم وعبيت "فورم" وقعدت استنى – كانوا 4 موظفين قاعدين ورا شاشات كمبيوتر و تحس ان الجو متكهرب – كانك ف قطاع عام مش خاص. جه دوري وسلمته كل الاوراق وقعدت استنى- طبعلي تقريرهم وقالي اطلع ع الوكالة. رحت الوكالة وقابلت المهندس واتفقنا هاسلملهم سارة بكرة الصبح واستلمها يوم السبت لما ارجع (ان شاء الله) وطبعا هادفع 750 ريال (غرامة تحمل)
اااااااااااااااااااااااااااااااااااااااااااه – كل دا كان مستخبيلي فين – منه ل الله اللي صدمني وهرب – خسرني فلوس ووقت وبهدلة وحرقة دم ووووو
يللا – الحمد ل الله على كل حال وان شاء الله سارة تطلع احلى J ويبعد عنها كل الحوادث والخدشات والصدمات April 14 بأي ذنب خُبطتوقائع هذه القصة لاتمت الى الخيال بصلة.......لذلك وجب التنبيه
يوم السبت- استيقظ عُبد صباحا كعادته كل يوم للاستعداد للذهاب الى العمل – ومن الطبيعي أن يكون يوم السبت أثقل الايام لانه بداية الاسبوع ونهاية الكسل والارتخاء. وعلى خلاف العادة , استيقظ اخونا سعيدا يرجوا رحمة ربه ويدعوه بأن يكون وزنه قد خف قليلا – لأن موعد المراجعة الاسبوعي قد حان- ولانه قضى اجازة نهاية أسبوع سعيدة ولانه سيذهب الى دبي في اجازة بنهاية هذا الاسبوع – فمن الاخر- كل ماحوله يسير بشكل جيد.
استعد وخرج من بيته وفكر بأن يرش الماء امام باب البيت ولكن عدل عن الفكرة- يافتاح ياعليم يارزاق كريم- ركب المصعد الاول وبعدين ركب المصعد التاني وسلم على سارة ولكن اكتشف ان الاخ –يطلق عليه مجازا اسم محمد- مازال يغسل فيها- الاسبوع الماضي كان مليئا بالرياح والغبار والامطار- فوضع جهاز الكمبيوتر وغدائه ف الشنطة وقال لمحمد خد راحتك. قال عُبد لنفسه, اهي فرصة اروح السوبر ماركت واشوف جابوا –حلاوة بقرة (عشان يديها للبنات) ولا لسة- راح مالقيش الحلاوة. نزل مرة تانية- محمد كان بيخلص و فجأة رأى عُبد اثار صدمة على الجانب الايسر لسارة- فرك عٌبد عينيه جيدا ليتاكد من صحة ما راه- وكان للاسف صحيحا فوجئ عُبد وقال : ياربي- من اين اتت هذه الصدمة؟ هل قدت السيارة وانا نائم؟ هل تقلت العيار امبارح وخبطت بيها وانا مش حاسس؟ هل وهل وهل- وباظ الصباح ياولدي.
ذهب عُبد الى المكتب وهو ضارب بوز وهو مازال يفكر: معقولة اكون خبطتها امبارح وانا مش حاسس؟ المشكلة انه السيارة كانت واقفة ف مواقف تحت الارض ولا توجد سيارة اخرى على يمين او يسار سارة..... وجلس عُبد يضرب أخماسا في أسداس. طبعا بدأ اليوم بداية غير سعيدة باي حال من الاحوال واصبحت عيناي تطق شررا ولافتة ممنوع الاقتراب محفورة على جبهتي. انتهيت من بعض الشغل وأخذت اوراق التأمين وعلى شركة التأمين- قال لي : لازم تقرير من المرور وورقة اصلاح. طيب- يا جماعة أفتوني: ازاي اجيب التقرير دا- قالولي بسيطة: وانت طالع النهاردة من الشغل اتصل بالمرور وقوله العربية اتخبطت وهي ف مكانها - قلنا طيب ورجعنا نكمل شغل. كلموني مركز الحمية وقالولي الاخصائية مش جاية واجلنا الموعد- احسن برضه. طلعت من المكتب ع الساعة 5 مساء واتصلت بالمرور – خدوا شوية بيانات وطلب اسم الشارع بس مالقيتوش فقعدت اوصفله: شارع العليا بعد بيتزا هت وقبل حديقة المكتبة على ايدك اليمين- لحظات ويوصلك...... راحت 10 دقايق وانا واقف ع الناصية وفجاة لقيت لوحة فيها اسم الشارع- فكلمتهم تاني عشان اديهم اسم الشارع: اول مارد قالي خلاص واصلك وماسمعش اسم الشارع. طيب نستنى راحت 10 دقايق ومافيش فايدة, 20 دقيقة عادي- نص ساعة –بدت العفاريت تنطط ف وشي- اتصل بيهم تالت مايردوش- قلت مابدهاش- خليني الف على رجليا يمكن الاقي عربية مرور كدة ولا كدة...... لقيت سيارة بوليس- سلام عليكم- وعليكم السلام, مرور يالطيب؟ لا والله دوريات – طيب اسفين. لفيت كمان شوية لقيت عربية مرور واقفة واتنين واقفين حوايها بيكلموا رجل المرور.... قربت منهم ولقيت الاخ بيقول: طالما مافيش اعتراف مش هاقدر اساعدكم وكل واحد يصلح سيارته ومافيش داعي للمشاكل ويابخت من قدر وعفي- مشيت وسبتهم ورجعت لسيارتي. الساعة بقت 6 وربع- اتصلت بيهم تاني وقلتلهم ياجماعة ليا ساعة وربع وماحدش عبرني- خد بياناتي مرة تانية ولحظات وهيوصلك. راحت 10 دقايق ولا حياة لمن تنادي. فجاة لقيت عربية بوليس ماشية ف الشارع العام- قلبي دق وقلت ياما انت كريم يارب- اخيرا بس كان ماشي على طول ومش جاي ناحيتي- اشرتله كاني باوقف تاكسي- وقف بعد 100 متر تقريبا- هرولتله- سلام عليكم- وعليكم السلام (كان جايب ساندتوشات وعصير وقاعد ياكل) – بالله تقرير عشان السيارة انخبطت- يالطيب انا دورية مانيب مرور- اااااااااااااااااااااااااااه طيب اسفين. رجعت للسيارة واتصلت بيهم للمرة الخامسة –كانت الساعة بقت 6 و50 دقيقة- رد قالي يا اخ عُبد خلاص جايلك طيب ع الاقل عرفوا اسمي- طبعا فكرت كتييييييراني امشي واطنش واصلحا على حسابي- بس الموضوع ممكن يخش ف 3000 ريال وانا عامل تامين ليه اساسا ودافع فيه شيء وشويات- خزيت الشيطان (والله الشيطان بعض الاحيان بيكون امور جنب البشر) – فجاة تلقيت اتصال من رقم غريب فرديت- اكتشفت انه دا رجل المرور المسؤول عن حالتي- واكتشفت حاجة تانية: اني مش فاهم تلات اربع كلامه – المهم قال لي تحرك وقابلني عند مطعم الكروان ف التخصصي ( مش الشرطة والشعب ف خدمة القانون) وماله يا اخويا نجيلك- وصلت مطعم الكروان وكلمته قالي دقايق واكون عندك..... جهزت اوراقي وقعدت استنى- بعد شوية سمعت صوت الونان قلت خير قرب- سمعته تاني- بصيت لقيته واقف ف الناحية التانية من الشارع وبياشرلي- (طب اعمل ايه؟ اشد ف شعري ولا اعيط ولا انتحر ولا اعمل ايه؟) سلام عليكم- وعليكم السلام- معليش الطيب كنت اتعشى (واشرلي ع الاكل) قلتله معلش اقلقنا سيادتك طلع ورقة التقاربر وبدا يعبي البيانات- وقالي الحادث ضد مجهول صح؟ قولتله صح لاني لو شفته كنت خدت فيه اعدام..... قالي على فكرة انت مفروض تروح مركز المرور عشان تاخد التقرير- بس انا هاعديهالك- ياسيدي مش عارف اقولك ايه – بارك الله فيك- قالي خلاص- راجعنا بكرة ف مرور الناصرية عشان تاخد التقرير.....
الله يستر من بكرة – وضاع الاسبوع والريجيم والمزاج وكل حاجة – ولا حول ولا قوة الا بالله April 09 29/3/2007التاريخ و التأريخ هما في رأيي غير المتواضع من أهم "الاختراعات" في تاريخ البشرية- وكما يقال- تعرف الانسان البسيط في الزمن الغابر الى أهميتهما لتأثيرهما على زراعته بشكل مباشر من تعاقب للفصول والامطار ووقت الحصاد والغروب والشروق وطول النهار والليل وارتباط بعض أنواع الخضار والفاكهة بمواسم معينة (طبعا أنا ماكنتش معاهم بس ممكن أخمن وأنا مطمن)..... لذلك – في حياة كل منا تواريخ لاحداث لاتنسى وغالبا ماترتبط بشيء يحدث لأول مرة وقد يكون سعيد أو تعيسا ولكننا نظل نحتفظ بالذكرى. من الطبيعي الا نتمكن من حفظ جميع هذه التواريخ ولكن جزء منها يعلق ف الذاكرة الى الأبد ....كتاريخ الميلاد, الالتحاق بالمدرسة, التخرج من الجامعة, أول سيارة, خطبة, زواج , أمنية تتحقق, وفاة, يانصيب, كارثة (لا سمح الله), بيت جديد,......
من تواريخ حياتي وبدون تفاصيل : 25-10-1980, 4-9-1997, 2-6-2002, 29-9-2002, 5-6-2001, 5-12-2001, 1-2-2005, 17-7-2004 11-4-2005, 16-2-2007, 7-1-2007, 22-2-2006, 26-8-2006, 16-11-2005, 1-2-2006, 1-2-2007 1-3-2007, 29-3-2007
اكتشفت اني مش فاكر تواريخ كتير واضطريت ارجع لاوراقي ودفاتري وجوازات سفري لتدوينهم واكتشفت أيضا ان حياتي قبل الجامعة كانت عادية وتقريبا بلا أحداث مهمة (أحداث أكون أنا طرف مباشر فيها)
-أجدد تاريخ ف هذه القائمة هو: 29-3-2007 وهو تاريخ خطوبتي على : أمل ( حيا الله أمل) هو تاريخ لمرحلة جديدة كليا- لانه بعد هذا اليوم ينتهي أي قرار يعتمد على معطيات أنا وينتقل الى احنا
من فترة وأنا أبحث عن شريكة حياتي وعلى راي حليم : ستفتش عنها ياولدي ف كل مكان , ولم يكن لدي تصور كاف عن كيفية التقاءها – ويشاء الله ان يتم الأمر بطريقة "اعتيادية – غريبة" : لقاء- رؤية- لقاء- رؤية- لقاء-تشات- لقاء- تشات- تشات- تشات- تشات-تشات- تشات- خطوبة J
حددنا الوقت ودعيت اخواني ووالدي (ضيا وصل من دبي وصعصع من الخبر) وللاسف لم تتمكن اخواتي البنات من الحضور وعيلة ضيا وعيلة صعصع وكانت ليلة.... كتجربة جديدة , أمضيت فترة من الوقت متفرجا ومراقبا ومفكرا ف اللي بيحصل ليا و حواليا ومعنى نظرات الحاضرين وتصرفاتهم (خسارتي ماطلعتش محقق او مخبر)
كم تمنيت حضور أمي لهذا اليوم ومباركتها لنا وأخذ رأيها والاستئناس بها ولكنها مشيئة الله ولا راد لها ولا معقب لحكمه
يللا- ربنا يهنينا ويسعدنا جميعا دنيا واخرة J وعلى راي الشاعر: وما نيل المطالب بالتمني ولكن يؤكل الفول قلابا ( قصدي : ولكن تؤخذ الدنيا غلابا)
وبدأ سباق المارثون وانا مستعد له أتم الاستعداد- يامسهل يا رب- وعقبال اللي عاوزين March 16 تحدي وتجربة جديدة
اول مرة سمعت عن الموضوع كان تقريبا من 3 سنوات وماكنتش مقتنع بيه تماما لاني كنت ماشي ع النظام بتاعي وكنت مقتنع بيه. كل اللي مشيوا عليه نفع معاعهم وجاب نتايجه – بس المشكلة كانت ف 3 حاجات:
وتمر الايام وبعد ان اكون قد استنفدت نظامي الى اقصى درجة بحيث من الصعب العودة اليه لاعتبارات عدة, ولوجود صديق يمر بنفس الظروف قررنا ان نشد ازر بعضنا البعض ونلجأ لهذا النظام.
لذلك وابتداء من يوم الثلاثاء القادم 20-3 سأبدأ حمية جديدة كليا بحيث سيتم ارسال ال3 وجبات الي (شوربة وسلاطة وطبق رئيسي وحلو وشرب) لمدة 30 يوما بحيث يكون مجموع السعرات اليومية التي استهلكها : 1800 سعرة حرارية بشرط اداء بعض الرياضة والامتناع عن اي شيء خارج هذه الوجبات (ماعدا الماء وممكن شوية خضار اخضر) الهدف: خسارة 20 كجم خلال 4 أشهر وعلى الباغي تدور الدوائر ولاحول ولاقوة الا بالله وبصراحة انا زهقت من موضوع الدايت والاكل والوزن ولكن ماباليد حيلة عشان الصحة ماتبقاش عليلة J وسلام مربع لكل المطاعم اللي ف الدنيا L الأكل الصينيتخيل انك دخلت مطعم صيني لأول مرة في حياتك وقعدت ( من الطبيعي انك ماتعرفش المينيو وماتعرفش تاكل بالعصاية بتاعتهم). كان لازم تروح لان من الضروري انك تمر بالتجربة دي. لما دخلت مالقيتش حد الا نفسك وأصحاب المطعم. تسأل أصحابك قبل ماتروح يقولولك اه لازم تروح طب ياجماعة اطلب ايه؟ اكل ازاي؟ اقعد فين؟ هادفع كام؟ يمكن ميزانيتي ماتسمحش..... تلاقي بلاهة قدامك. وشوية نصائح مالهاش لازمة: يبقى سم قبل ماتاكل واغسل ايديك كويس وماتنساش تنشف..... ياسلام- لا حاجات ماكنتش عارفها لا واذا مارحتش – تلاقي الكل بيستغرب: انت لسة مارحتش؟ معقولة – مستني ايه.... هو فيه زي الاكل الصيني وحلاوته.... وتلاقيه اول ما يطلع من المطعم يروح شاتم ف المطعم وصاحب المطعم والاكل كمان- شيء غريب
دخل الاكل: وطبعا طالما انت لحالك تبقى عيون اصحاب المطعم عليك وبيراقبوك وبيشوفوا ردة فعلك – ماهو مش كل الناس تقدر تخش نفس المطعم ( في مطاعم لكل مستوى) وهل انت قد المطعم دا ولا لأ.... وطبعا كاي اكل تاكله لاول مرة مابتقدرش تكون انطباع كامل وياترى هل هو دا الطبق اللي هاتختاره عشان يبقى طبقك المضل ولا لأ ودا غير لخبطة اجراءات الاكل: اي عصاية تاكل بيها الاول, تشرب الاول مية ولا عصير – تطلب شطة ولا الاكل مشطشط خلقة ووووو
تخلص الاكل وانت مش عارف؟ هل كنت قد المطعم ولا لأ, هل عملت اي غلطة؟ هل وهل وهل طب ايه اللي مفروض اعمله المرة الجاية؟
مالها الكبسة بس ولا حتى الكشري كرسي المنتصفقربت الرحلة من نهايتها وايه اكتر حاجة قعدت افكر فيها؟ طبيعي : الكرسي اللي هترزع عليه ف الطيارة وانا راجع من البرازيل ل باريس. دخلت ع النت وفتشت على موقع الاير فرانس وجيت اقطع البوردينج فاكتشفت ان الخدمة شغالة للي معاهم تيكيت اليكتروني (وطبعا احنا لسة تذاكر ورقية) فندبت حظي L كلمت الباشا المسؤول عن الجروب وقولتله يا حج – الله يخليك (ينوبك ثواب) عايز أقطع البوردينج – بص لي شذرا: وقالي ايه؟ بوردينج – نسق مع الهيلب ديسك. حبيت اغريه : قولتله انا ممكن ادفع 50 ريال برازيلي (تقريبا 27 دولار أمريكي) بس اخد مكان كويس, بص لي بعبط واهتمام وقالي: الهلب ديسك ه يساعدك. ماشي رحت ع الهيلب ديسك- 4 بنات برازيليات (يعني انجليزي نص نص)- هااااي : عايز أقطع بوردينج؟ واضح انه كلمة بوردينج بالبرتغالي معناها مش محدد مافيش فايدة غطيني ياصفية..... وصلنا لاخر يوم وهنطلع ع المطار الساعة 4 العصر. صحيت متأخر – فطرت- نزلت ع الكورنيش وخدته للاخر واشتريت شوية تذكارات ورجعت للفندق (كان الجو مشمش وانا مابحبش الشمس- سوري يا شمس مش عداوة والله بس عندي تخمة منك مع الاعتراف باهميتك وفائدتك وانك على راسي من فوق). جهزت الشنطة (وكنت عامل حسابي وواخد شنطة كبيرة عشان ماتعذبش لما ارتب حاجاتي J) وحطيتها ف الريسيبشون- بعدين طلعت مع ماجدة عشان تشتري هدية لجوزها. بعدين اكتشفت ان هدية جوزها دي هي الحاجات اللي جابتها لنفسيها – وكل ماتجيب حاجة لنفسها , افكرها بجوزها لغاية ماجبيتله تي شيرت (ستات اخر زمن) ركبنا الباص ع المطار وبديت ابلم. وصلنا وطوابير لغاية مانقطع البوردينج. أبوس ايدك ممر – مافيش – يادي النيلة الاماكن الوحيدة ف النص. قطعت بوردينج باريس- الرياض وسلمت امري لله. عديت الجوازات وطبعا عند التفتيش قلعنا كل المعادن (منهم لله اللي ف بالي) ولقيتهم بينادوا ع الركاب, وقفت ف الطابور وكنت عطشان فرحت اشتري دايت بيبسي – لقيت واحد وواحدة- والطابور بتاعي ماشي ودول لسة واقفين. لسة بانطق انا عايز ايه- لقيت الست نطت لي: انا واقفة قبلك- طيب ياستي انا اسف وحقك عليا الراجل خلص وهي لسة بتدور ع الفلوس ومش عارفة عايزة تطلب ايه واللي بتشتغل واقفة مابتعملش حاجة- رحت طلبت ودفعت – انتبهت الست وبصت لي بما معناه : عملت اللي ف راسك برضه وقالت : what a great manners – اتهزأنا يا جدعان (قلتلها سوري انت واقفة ماطلبتيش وديتها ابتسامة اعتذار و رجعت للطابور) وانا بالف رجلي خبطت خبطة اليمة (وكعادتي ف تلقي الصدمات : عادي ولا كان حاجة حصلت). دخلت الطيارة وانا بادعي علشان حد جنبي يطلع طفل ولا حاجة. رحت ع الكرسي المخصص لقيت شاب رياضي على شمالي واللي على يميني لسة ماجاش. قعدت اتابع الكراسي الفاضية عشان لما تنقفل ابواب الطيارة اسطوا على واحد منهم. بعض زملاء الرحلة كانوا محظوظين والكراسي اللي جنبيهم فاضية قعدت احسد فيهم (ودا الحسد اللي هو الحسد: زوال النعمة عن المحسود). شرف الباشا التاني اللي على يميني (الحمد لله مش تخين وقضا اقل من قضا). والحمدلله ان الكرسي اللي قدامي فاضي فمافيش حد يغلس وبرجع ظهر الكرسي عليا. كان مستحيل اني اغير الكرسي فقبلت بالامر الواقع. ساعة – ساعتين- 3 ساعات (كان معايا كتاب وقعدت اقرا فيه)- 4 ساعات – مافيش نوم ولا حركة. بعد 5 ساعات تعرفت على اللي قاعد على يميني: فرنسي بيشتغل ف شركة بترول وبيخاف من الطيارات والشيء الوحيد اللي يساعده على تخطي الخوف دا هو انه يسكر. فقعد يشرب ويشرب ويشرب لغاية ماتسطل ونام. بعد 6 ساعات الباشا اللي على شمالي (طلع برازيلي ومايعرفش انجليزي) اتزنق وعايز يروح الدورة- نصحي ف الاخ اللي ع اليمين – مافيش فايدة نهز ونرج ونخبط ولا حد بيرد. بعد 5 دقايق فتح عينه - معلش عايزين نعدي : ولا معانا ولا فاهم- بس ربنا سهل. رجعنا قعدنا مرة تانية. شوية ولقيت راسه على كتفي ( كملت) – يا حج يا باشا يابن ال... ولا حد هنا. ماصدقت المضيفة عدت فقولتلها شوفيلي حل: شدته وعدلت راسه. وقعدت ساعة ف الموال دا : ينام على كتفي وانا ابعد فيه. اتلهيت بالافلام المعروضة وحاولت اضيع الوقت بيها. وصلنا وبصراحة ان كان عليا كنت قمت اتحزمت ورقصت: 12 ساعة محبوس ف الجو وكرسي ف النص وجنبك واحد سكران والتاني بتتعامل معاه بالاشارة. نزلنا المطار ورحنا الصالة بتاعتنا وقلعنا كل المعادن ودخلت الطيارة بعد ساعة وكان الكرسي ع الطرف – بس برضه كان جنبي ناس. 7 ساعات عدت ووصلت الرياض – ختمت الجواز وخدت الشنطة وقعدت استنى ف محمد صاحبي ساعة كمان (خ...ا عليك يامحمد, كنت خدت تاكسي وخلصت, هو انا ناقص- بس يعطيك العافية , تعبتك معايا J). وصلت البيت بعد يوم كامل من السفر والتعب ووووو وكانت رحلة مليئة بكل شيء ويكفيني فخرا ان اكون اول شخص ف العائلة الكريمة يسافر الى هذا الجزء من العالم رحلة حفرت في الذاكرة واثرت التجربة وانضمت الى مثيلاتها في ملف احلى الاوقات و ابريجادو (شكرا بالبرتغالي)
عقبال هاواي لو ربنا سهل J
March 10 ريو يا جدعانكانت ليلية جميلة ومليئة بالجديد وبالاثارة والمتعة J تاني يوم : الاجتماعات بدأت ع الساعة 8 ونص وكالعادة -السناكس كانت موجودة وبصراحة طعمهم كان حلو والعصاير كانت روعة فمن الطبيعي اني هجمت عليهم (لايك ذير از نو تومورو). طبعا عشان كان معانا عملائنا فالشغل ماكانش مركز – يعني 4 ساعات ف اليوم (في الظروف العادية بيبقوا 9 ساعات زي الله واحد). حان موعد الغدا بس كبرت دماغي – ع الساعة 2 كان الكل لازم ينزل علشان في زيارة جماعية ((team building activity ركبنا الباصات و طبعا مش عارفين رايحين فين. قعدت اتفرج ع البلد. وصلنا واكتشفنا انه احنا ف المكان اللي بيتدربوا فيه ع الرقصات اللي ف الكرنفال- اول مادخلنا المسرح كانوا حاطين سفرة مليانة فواكه (اللي نعرفه واللي مانعرفوش) أحجامهم كبيرة بس السكر قليل شوية- احنا انشغلنا بالاكل – وفجأة سمعنا حد بيزعق ف الميكرفون بانجليزي مكسر: انتم جايين هنا تاكلوا ولا ايه؟ دا كان واحد من مدراء الكرنفال والباشا جاي يشرحلنا كل حاجة عن الكرنفال والتحضير والمدارس والتقييم والالات الموسيقية ووو وان الفكرة من المهرجان هي الاستعداد قبل الصيام
واحنا قاعدين! يلا لازم نعمل الرقصة بتاعتنا (تقريبا 70 واحد) فحددوا مدير الفرقة- والمشرف العام و المطبلاتية وكتاب النشيد والملحنبن وراسم الشعار وووو وهات ياتدريب وتحضير- الحمدلله كان دوري هامشي وقعدت انفخ بالونات واتفرج عليهم – بعدين بدأنا : الموضوع بصراحة مش سهل لانه في تقييم ولجنة تحكيم (بتكلم ع الكرنفال الحقيقي) وبيقعدوا يتدربوا السنة كلها ع الموضوع دا. وطلعنا بحكمة منه: انهم لما يحبوا يعاقبوا عضو ف الفرقة (عشان مابيشتغلش بذمة او كسول او حاجة) بيدوله الة صماء لاتصدر اي صوت ويقعد يشتغل زيه زي اي حد تاني بس من غير اي أثر او تاثير (يعني بالعربي هيخلوه ينفخ في قربة مقطوعة)
رجعنا ع الفندق وكان قدامنا ساعة عشان نتلم مرة تانية ونطلع للعشا. رحنا مطعم TUDO DE BOM (مش متاكد من الاسم) بس هو مطعم مشاوي ! مشاوي من كل نوع لغاية ماتطلع عينك – طبعا انا كنت غاسل ايدي من الاكل البرازيلي- قعدت اكل سلطة وعيش وزبدة واشرب ف دايت كوك فشبعت قبل ماكتشف حكاية المشاوي دي – وكالعادة حليت بايس كريم رجعنا ع الفندق وطلعت نمت. صحيت حاسس بشوية برد ورشح فطلعت ع المطعم – ف الدور ال12 وشربتلي عصير برتقال عشان يضبط المسائل – بدينا الشغل ع الساعة 9 للساعة 1 . تغديت وبدينا نتحضر عشان نروح مشوار اليوم- ركبنا الباصات (طبعا عشان معلات الجريمة مرتفعة هناك- كان الامن حوالينا طول الوقت ولاسلكي وكلمات سر (الكتكوت ف القفص) وحاجات كدة) وصلنا. مطعم صغير مكشوف نشرب فيه عصير ونستنى دورنا عشان نركب الهليكوبتر اللي هتوصلنا للمكان اللي هانزوره (كوووول). ركبت الهليكوبتر مع 3 تانيين وكانت تجربة رائعة – انت مرتفع بس مش عالي جدا- شوفنا البلد من فوق ولفينا حوالين التمثال الضخم لسيدنا عيسى Corcovado – مع اختلافي طبعا مع معتقداتهم بس فعلا التمثال مهيب – وكونهم حاطينه فوق اطول تلة ف البلد 720 م بصراحة طلعت بنقطتين من التمثال دا: 1- ان الانسان غالبا لازم يدور على كبير (اله) يلجا له ويعتمد عليه وووو 2- انه ربنا سبحانه وتعالى على الرغم من قدرته من تدمير هذا التمثال ف لحظة – فانه لم يزل قائما لحكمة يعلمها سبحانه قعدت ف الهليكوبتر 8 دقايق والناس تحتنا ع البيتش زي الرز – ناس عايشة حياتها ومكبرة دماغها- وصلنا للضفة الاخرى وانا مصدع (الصوت جوة عالي جدا) رحنا وركبنا التلفريك واتفرجنا ع الطبيعة الساحرة وطبعا التصوير شغااال. خلصنا ورجعنا للفندق وكان حظي انا واللي معايا ف جيب كشف- والجو كان حلو والهوا منعش كان قدامنا ساعة عشان نتحضر للعشا – وكان دا يوم الجالا دينر – وتوزيع الجوايز على الكباتن. جابولنا اتنين لابسين لبس المهرجان ( اغلبهم بيكونوا من اصل افريقي) وطلبوا مننا ان احنا نتصور معاهم – وقفت ف الدور وخدت الصورة مع ماجدة. الاكل كالعادة : البعد عنه غنيمة. بعدين جابولنا فرقة موسيقية 3 رجالة اكبر من بعض- بس العزف بتاعهم رائع. خلص العشا وبدأت السامبا : فرقة حسب الله البرازيلية اشتغلت (بس بالبرازيلي طبعا) رجعت ع الفندق وطلعت مع الجروب نلف حوالين الفندق وبعدين رجعت ونمت. الحمدلله الصبح مافيش شغل ومافيش صحيان بدري (فمارست هوايتي المفضلة في الاجازات: الصحيان متاخر) اتغديت ورحت ع المسبح – وبرضه لقيت فرقة حسب الله – فقلت مابدهاش لازم اتصور معاهم. ع الساعة 7 كدة نزلنا عشان نتعشى ورحنا مطعم متخصص ف الاكلات البحرية (اللي انا باكل منها التونة بس) ومن غير ماخش ف تفاصيل- طلعت ع الحلو وحليت. وزعوا علينا تذاكر الكرنفال وطلعنا عليه- طبعا كووول – الكرنفال اللي بنسمع عنه بقينا بداخله – وهات يازعيق وفرفشة ورقص وتصوير (قبل مانروح وزعوا علينا ورق صغير من اللي بيترمي ع الناس) – كان المكان عامل زي الملعب طوله تقريبا 70 متر والمشجعين ع الجانبين . والفرقة بيكون عدد افرادها كبير عشان يغطوا الملعب من اوله لاخره وكل مدرسة ليها ثيم معين بيشتغلوا على اساسه ( مدرسة منهم كانت مستخدمة حاجات من مصر الفرعونية- عظيمة يا مصر). الجروب اللي معايا طفى ع الساعة 12 بالليل فقررت الانضمام اليهم مع ان المهرجان مكمل للساعة 6 الصبح.
وكانت ليلة من العمر J
يتبع
March 04 أبريجادوبدأ الموضوع من باب التحفيز لشيء من الصعب تحقيقه, انتم هاتوا المطلوب منكم واحنا هناخدكم ع البرازيل – هههههههههه قال البرازيل قال- بس كان فيه ناس ناصحين, وثقوا الموضوع دا ف ايميل.
ومرت الأيام وبدت سنة 2006 تخلص وبدأ الكلام عن البرازيل وانه بعض الناس رايحة والباقي مش رايح وطبعا كعادتي في توقع الأسوأ لم أمن نفسي بشيء حتى مع بعض التأكيدات من بعض الأطراف. يوم 20-12 -06 استلمت ايميل الدعوة الى ريو دي جانيرو فقدمت الورق للسفارة البرازيلية واستلمت الفيزا.
ياجماعة البرازيل – حلم ولا علم- دا انا كان اقصى احلامي وانا ف الجامعة اني اطلع البحرين- ورحنا فرنسا ورجعنا والواحد اتلهى بالشغل . يوم 7 -2-07 استلمنا تذاكر السفر واكتشفت اول مشكلة: مافيش طبعا طيارة تاخدها من الرياض الى ريو دي جانيرو – فكانت الرحلة من الرياض الى باريس ( 7 ساعات) بعدين باريس الى ريو ( 12 ساعة) وبين الطيارتين 19 ساعة انتظار ف مطار شارل ديجول. ياجماعة لا ماينفعش, طب نغير خط السير , طب نحاول نجيب تأشيرة شنجن او ترانزيت- انسى. طيب لله الأمر من قبل وبعد.
على فين مسافر ياعبد؟ ع البرازيل..... ياه البرازيل حتة واحدة , اه ياخويا-ياختي حتة واحدة, طيب ياعبد يبقى سلملنا على رونالدينو (ياجماعة دا ف أسبانيا) او يبقى هات لنا بن معاك (حاضر- من عيني)
يوم الفالنتين 14-2 , جهزت الشنطة و ع المطار (الطيارة الساعة واحدة الصبح) خدت التاكسي ورحت بدري عشان احاول احجز كرسي ممر-مخرج عشان على الاقل امد رجلي. طيارة باريس صغننة (ايرباص- الله ع البوينج الكبيرة- بلا ايرباص بلا بطيخ) فقلتله : ابوس ايدك شفلي موقع حلو ف طيارة البرازيل: قال لي ماشي – الحمد لله الكرسي اللي جنبي فاضي – ارتحت شوية. وصلنا مطار شارل – كنا 4 أشخاص , 2 مش محتاجين فيزا و 2 محتاجين فيزا عشان يخرجوا من المطار (طبعا كل الجنسيات الونس لازملها فيزا- هي ايه فوضى؟ وعلى راي المثل : على نفسها جنت براقش) ال 2 دولي خرجوا وال 2 التانين (اللي انا واحد منهما) قعدوا يحاولوا ( زي اللي بينفخ ف قربة مخرومة) مستحيل تطلع من المطار. كمان ساعة وصلت طيارة دبي (معانا ف الرحلة الى ريو – كان مجموعنا تقريبا 80 شخص وشخصة) وكان برضه في ناس معاها فيزا وناس لأ- انضم لينا 3 أشخاص (دا تطبيق المثل: اتلم المتعوس على خايب الرجا) وبدينا المحاولات مرة تانية – انسى بدأت الافكار الخزعبلية: طب احنا نسافر الى دولة تانية ومنها نطلع الى ريو- طب احنا ..... بعد 30 دقيقة ايقنا بمصيرنا المحتوم وامنا بقدرنا..... جعنا- طب ياجماعة اي تيرمنال عدلة وفيها مطاعم يتاكل فيها؟ كل واحد يدينا رقم (A-B-C-D-E-F) خدنا اتوبيس المطار وقعدنا نلف عليهم – لقينلنا كافيه: فطرنا وقعدنا نتكلم ونتفرج ونشتم ف اللي طلعوا وسابونا ونشتم ف اللي نظموا السفرة ونشتم ف .....- فعلا : من اصعب الاشياء ان تصل الى الشيء الذي تريده وقبل خطوة تكتشف انك لا تستطيع- يعني باريس اهي – كل المطلوب اني اطلع من المطار – وفي غرفة ف الفندق محجوزة ليا- عندي وقت انام وارتاح واخد شور واتمشى (ماهو انا وباريس ( باريس المدينة مش الشخصة) بقينا حبايب- ولكن كل دا كان اوهام .رحت جبت الشرق الأوسط والحياة والأهرام (للأسف الكتب اللي خدتهم معايا كانوا ف الشنطة اللي ف الشحن وبالتالي كنت طرازان من غير كتب. الساعة بقت 10 الصبح (لسة 13 ساعة) – رحنا للتيرمنال اللي هنسافر منها – وطبعا تفتيش ذاتي واللي معاهم سوائل (حتى لو شامبو) بياخدوه- منهم لله اللي كانوا السبب. حاولنا ننام – مافيش فايدة وهات يا أكل: ساندويتشات على عصاير على شيبسي على سلطة وهات ياكلام, وهات ياشتايم بدأت المجموعة تكتر شوية من الناس اللي وصلوا من دول تانية – واحنا قاعدين زي المقاطيع- نتفرج ع الناس وهي بتركب طياراتها- واحنا بنقول يا مسهل. كراسي الصالة مش مريحة – قررت اني انام ع الارض- رحت بعدت عت اللي معايا واخترت صالة فاضية وتحت عمود ومددت ع الارض.
الساعة بقت 4 العصر (لسة 7 ساعات) اقترحت نلعب كوتشينة : وبدينا نلعب طرنيب وأرقام وبدات الأفواج تتزايد والوقت يمر- و يللا عشان تطلعوا الطيارة ( يارب الموقع يكون حلو) – لقيت نفسي عند الشباك ومش ع المخرج- ورايا راكب (مديري) وقدامي راكب (مدير مدير مديري)- يعني ساندوتش وجنبي راكبة . طبعا من غير ما اعمل اي حاجة كانت ركبتي ف الكرسي اللي قدامي – يعني مستحيل يقدر يرجع كرسيه- بعد الاقلاع بشوية طفوا النور وبدا الكل ينخمد- انخمدت معاهم- ةنصحى وننام – طبعا نومة لايعلم بها الا الله- ومش مرتاح ( يعني هل من العقل ان كل الكراسي تكون بحجم واحد؟ يعني حيطة زيي يكون الكرسي بتاعه بحجم الكرسي بتاع طفل عمره 5 سنوات؟ هل دا عقل؟ فين الامم المتحدة؟ فين حقوق الانسان؟ يعني مش كفاية راسي الغلبانة وكمية الخبطات اللي بتاخدها- نداء لذوي القلوب الرحيمة: الرجاء التعامل مع طوال-عراض القامة بشيء من الاهتمام والرعاية- الحقونا قبل ماننقرض وتقول ياريت اللي جرى ماكان). الطيارة خشت ف الاجواء البرازيلية وبدات الطبيعة الجميلة تبان- الجبال والخضار والبحر ووو. الحمد لله وصلنا المطار– بداخلي كانت صرخة ( ياااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااخرااااااااااااااااااااااااااااااااااابي) ولكني كتمتها بداخلي مع أشياء اخرى كثيرة - وبدينا نعبي الفورمز اللي وزعوها علينا- طبعا ممكن شكلنا كشرق أوسطيين يدي على برازيلي. المهم طلعنا من الطيارة ورحنا لصالة الجوازات – طوابييير (عالم ثالث بقى) بس البرازيلين كان ليهم بوابة خاصة – ونص ساعة ف الطابور لغاية ماوصلنا للباشا الضابط ( كان بداخلي تفكير في تمديد الرحلة يومين لزيارة اكبر عدد ممكن من الاماكن ف ريو- هو في حد عارف اذا كنا هنروحها تاني ولا لأ؟) الكابتن سالني: ايجبسايانو؟ قلتله اه, قالي هنا عشان الاجتماع بتاعكم : قلتله اه , قال هاتقعد كام يوم؟ قلتله 4 ايام ( انا واخد التاشيرة 90 يوم متعدد الدخول) لقيت الكابتن خاتملي على الورقة تصريح ب 5 ايام بس- بصراحة اتنرفزت ( بداخلي طبعا) وقررت عدم التمديد (مش زي لحود) ماعلينا- رحت استلمت الشنطة وعديت ع الجمارك وطلعت للصالة الخارجية- واسمع صوت الخبط : فرقة سامبا بترحب بالقادمين ( كرنفال ريو هيبدا كمان 3 ايام) شفت اللوحة اللي تبعنا ورحت مكان الانتظار عشان الجروب كله يتجمع. ركبنا الباص ورحب بينا الدليل و بدأ يكلمنا عربي – طلع لبناني مهاجر من 20 سنة وبدأ يشرحلنا بالعربي. البرازيل : دولة ضخمة- عدد سكان مهول- اقتصاد ضخم – فقر – اجرام- اعراق ( استلمنا كمية تحذيرات وماتنزلوش لوحدكم بعد 7 بالليل- وسيب المحفظة ف الغرفة- وماتمشيش الا بمبلغ نقدي صغير) مرينا بالمناطق العشوائية ومرينا بالداون تاون لغاية ماوصلنا كوباكبانا ( باختصار هو دا الحي اللي الفندق Excelsior Copacabana غرفة 510 موجود فيه- ع الكورنيش J) الجو كان حر ورطوبة شوية. طلعت الغرفة وانسدحت ( يعني نمت بالمصري). صحيت بعد 4 ساعات ونزلت اتمشى ع الكورنيش ونشوف الناس والبحر. ايه اول حاجة تلاحظها: ان الملابس هي تجارة فاشلة ومش منتشرة هناك – يادوب شورت وفانلة وكاب J مشيت لاخر الكورنيش ورجعت تاني – كان عندنا عشاء جماعي – غيرت و ع الميكروباصات اللي هتوصلنا ع المطعم. احدى المشاكل اللي بتواجهني ف السفر : اي جروب انضم له – طبعا انا انسان مقرف واللي زيي انقرضوا بس هنعمل ايه- لزقت ف الناس اللي اعرفهم ( مديري والموظفين بتوع الموزع بتاعنا) وكمان شوية انضمت ماجدة (من مكتب دبي) لينا. وزي نظام أسبانيا : العشا بيجي على مراحل (واول حاجة: المشروب الرسمي : Caipirinha – نصيحة : ماتقربوش منه. السلطة: تعدي- الطبق الرئيسي : سيبك منه , الحلو: ايس كريم : احلى حاجة) تكلمت ماجدة عن اللي حصللها لما سافرت مصر وان الناس بقوا بيطلبوا منها انهم يتصوروا معاها وهي مش فاهمة ليه- لغاية ماضطرت تتحجب J خدنا شوية صور و ع الفندق.
هنا الشللية اشتغلت وكل شلة عايزة تطلع مكان: اللي طلعوا ناموا واللي قعدوا يلفوا واللي راحو مونت كارلو واللي واللي. كان نصيبي 2 من ليبيا وواحد مصري ف الكويت, اتمشينا شوية ع الكورنيش وشربنا الكوكونت وعصير مانجا (الفاكهة عندهم بالكوم وحجمها ضخم بس من غير سكر!)
يتبع February 23 سئمت منكسئمت منك من جبنك من ترددك من تفكيرك من حرصك من تمثيلك من طريقتك من خجلك من استسلامك من ضعفك من توترك من مداهنتك من مصارحتك من هجومك من دفاعك . . . سئمت منك وأعانني الله عليك رسالة لكل ذكرسلمت بانك أقوى ..... أقوى أقوى أقوى وأنا أضعف منك أيوة ..... أيوة أيوة أيوة لكن انا كل مابضعف قدامك بابقى الاقوى
باسكت وباقولك امرك ...أؤمرني يامالك عمري... تحلم وتفوق من حلمك وانت بتنفذ أمري
لو ضعفي اللي هيرضيك... انا دايما ملك ايديك لكن عمرك ماتقدر تاخد من غير ماديك
باسكت وباقولك امرك ...أؤمرني يامالك عمري... تحلم وتفوق من حلمك وانت بتنفذ أمري
اؤمر هتلاقي خضوع ... وتشوف ف عينيا دموع بايديا وسهل عليا ..... لكن هتكون مخدوع
هاسكت وهاقولك امرك ...أؤمرني يامالك عمري... تحلم وتفوق من حلمك وانت بتنفذ أمري
سلمت بانك أقوى ..... أقوى أقوى أقوى وأنا أضعف منك أيوة ..... أيوة أيوة أيوة لكن انا كل مابضعف قدامك بابقى الاقوى
الله يا سميرة ع الابداع- كلام واضح وفي الصميم للي عايز يفهم ولا عزاء للأغبياء |
|||||
Send a private message
Subscribe to RSS feed
Tell a friend
Add to My MSN
Add to your network
Sign up for alerts|
|
